E limitacion di un pais pa Dialoga cu su partnernan social, por wordo mira tambe como un exclusion di e representantenan di nos ciudadanonan den e tumamento di decisionnan importante pa Pais Aruba. Sigur ora toca problemanan grandi, manera loke Aruba ta aden. Esaki ta e causa tambe cu ta hopi dificil defini kico ta loke ta uni nos. No tin informacion, no tin transparencia y e hende no ta envolvi. Pues, por bisa cu no tin construccion di e brug ey pa tur hende yega na otro. Esaki ta loke cu Magaly Brito, Secretario General di sindicato SEPPA (Sindicato di Empleadonan Publico y Priva di Aruba), ta bisa den un declaracion.
“Esaki ta otro eror!. Autonomia ta inclusivo na unda ta duna participacion real. E respet pa esaki ta limita na un stop di haci, stop di cana cu un libertad negativo. Y al contrario si kier balora nos autonomia y nos kier haci nos libertad positivo e ta implica compronde cu e libertad ta imposibel sin algun condicion basico.”
E ta bisa cu sindicato ta para pa Democracia, pa Dialogo, pa nos patrimonio y e derecho pa nos dicidi como Pais riba nos mes.
Ta increibel e posicion cu Hulanda ta tuma frente Aruba. Si Hulanda ta papia di Democracia, Transparencia, Negociacion, Dialogo real y Etica e mester para pa esaki tambe. No por ta asina cu Aruba ta sufri daño grandi ajeno na nos control y Hulanda ta asumi un actitud abusado contra nos ciudadanonan.
Trahadonan na Aruba, pues un gran parti di ciudadanonan di Aruba ta wordo manda cas, un mayoria grandi den incertidumbre di kico ta spera nan, apesar di e ayudo di gobierno cu Fase y despues cu Loonsubsidie. Y den tur esaki Hulanda en bes di yuda e ciudadano na Aruba, ta probecha di nos debilidad como pais y kier obliga nos contra tur leynan of regla, pa acepta condicionnan cu ta mina nos derecho como pais?. Pa colmo, tur cos mester keda scondi.
Esaki ta mescos cu probecha contra e ser humano hambriento cu no tin otro opcion cu acepta abuso con tal e come un tiki. “Ta con lo mester yama tipo di actonan asina?. Aruba ta bati na porta di Hulanda pa busca sosten y e ta tira nos mas leu den e pos. Ta bon pa Hulanda splica kico ta su moral y con e ta defini su etica propio. Ta parce cu Hulanda ainda ta biba cu e rencor cu e hecho cu Aruba tin su Status Aparte y awe e a haya e oportunidad pa primi e Rubiano.”
