Maestronan a core la voz y asina cuminsa expresa nan preocupacion riba un inseguridad na scolnan. E siman aki tabata tin un caso unda un mayor a agredi un maestra di edad halto cu ta dunando les na St Franciscus College.
E maestra ta pensionado pero ta sigui duna les pa motibo di scarcedad di educador. Nos ta bon na altura di e caso aki cu awor a cuminda crea un preocupacion publico ora cu otro maestronan tambe a tende di dje.
A papia cu e mama mes cu ta mustra toch preocupa cu e sucedido. E tin tres yiu ta bay e dicho scol. Tur tres ta yiu homber. Un di nan a hiba bolo scol. E no a hiba pa parti entre tur e muchanan den klas.
A hiba solamente pa algun y na scolnan e maestronan no ta permiti pa parti bolo ora tin cumpleaños si ta solamente pa algun mucha. Sea ta trece bolo pa tur mucha of no mag parti pa algun den klas.
E saco di bolo a ser entrega na e persona encarga cu transport di e muchanan. Ora e mama a tende loke a pasa e no a aprecia. El a splica cu e maestra a atende den forma bruto cu su yiu y kita of ranca e saco cu bolo for di dje.
Ora el a entrega e saco di bolo bek, tambe a actua bruto y fresco bisando cu si kier parti e bolo por haci esey pafo di cura di scol. Cu e pensamento ey e mama a bin scol pa asina atende cu e problema di su yiu.
El a bin cu su ruman. A purba pa atende cu e maestra pero nan no a confia e asunto na scol. Pesey mes nan a dicidi di hinca e mama den oficina pa papia cune. E actitud di e mama e momento ey tabata mustra agresivo. Su ruman a keda pafo.
Nan a lock e porta pa e no drenta. A cuminsa atende e problema y e mama a bay dal e maestra. Algo cu no mester a pasa y cu awe e mama mes ta arepenti. Nan a keda di yama Polis pero Polis no a yega y e mama a subi e transport y bay.
E señora encarga cu transport a bisa cu ningun momento nan a trate malo na scol ora di busca e yiunan di e señora. E mama tabata tin miedo cu lo kita su yiunan for di scol. Esey e cabesante a bisa cu nan lo no haci.
E mama lo no mag subi tereno di scol mas. E maestra agredi a bay haci denuncia na Polis. SKOA a yama e mama pa presenta. Nan ta purbando di busca otro scol pa e muchanan.
Den comberscion cu nos tabata tin cu e mama a mustre cu su comportacion lo bay perhudica e muchanan. El a compronde esey. Si e bay otro scol y haci mescos ta pio pa su mes.
E mama a splica cu e muchanan ta bin keha riba e trato cu nan ta hayando na scol cerca e maestronan. Na St Franciscus College e maestranan ta malcontento y hasta den un forma pasivo a expresa nan preocupacion. Loke a pasa awor ta cu otro scolnan a mira e sucedido y a cuminsa move y exigi pa gobierno cuminsa haci algo pa garantiza mas seguridad na scolnan. Nan no kier bira victima di violencia.
SIMAR na su turno tambe a move mesora riba e asunto aki. E maestronan kier prepara un manifestacion tambe diabierna awor. Nan kier topa 2or na Wilhelmina Park y hunto sali pa bestuurskantoor pa entrega un manifiesto.
