Diahuebs mainta, maestronan di Emmaschool, cu apoyo di algun trahadonan di Fundacion Ambiente Feliz, a presenta tanto na bestuurskantoor y parlamento pa asina entrega nan manifiesto, sosteni pa sindicatonan SEPPA y Simar.
Josephine Albertus, di parti di Simar, a comenta cu nan a reuni cu prome minister mr. Evelyn Wever-Croes, na bestuurskantoor y a entreg’e nan manifiesto. Un delegacion chikito a drenta p’aden cerca dje, unda cu durante e dialogo e prome mandatario a indica na nan cu nan lo ricibi un contesta prome cu dia 9 di maart.
Loke e maestronan kier ta un contesta positivo riba e fuseering di Emmaschool y Scol Paso pa Futuro, cual hecho nan no kier pa bay door, mirando e carta di e minister di enseñansa ta bisa cu esaki si ta continua y ta ilustra cu e no ta responsabel di loke ta bay pasa.
Segun Albertus, esaki mester bay na un manera responsabel. Full e fuseering aki no a bay manera mester ta.
E maestronan a presenta despues na parlamento pa asina entrega e manifiesto tambe na presidente di parlamento Ady Thijsen, caminda cu tambe nan a pidi un reunion prome cu dia 9 di maart.
Pa loke ta Fundacion Ambiente Feliz, Magaly Brito, secretario general di SEPPA a splica cu e trahadonan tambe a dicidi di bay den accion di protesta, pa asina mustra nan mal contento, debi cu ainda e MB cu mester ta firma pa regla pago di bashipremie no ta cla.
Nan a bin exigi na gobierno pa keda cla cu MB pa asina e pago tuma luga. Ta un acuerdo entre fundacion y gobierno cu mester a regla parti huridico. No a firma ainda debi cu tin pregunta, pero ta haya cu a tarda demasiado, p’esey nan a bin protesta.
