Diaranson Aruba tabata riba un codigo cora, door di un tormenta tropical. Door di esaki gobierno a declara un shelter in place, pa cual varios luga a cera nan portanan trempan.
Pero despues cu e menasa mes a pasa, gobierno a declara cu tur sector priva por bay traha normal bek. Sector publico a keda cera pa un dia mas, cual sigur a perhudica hopi hende.
Un di e personanan perhudica tabata Mady Kock, ya cu e lo mester a biaha hunto cu su nieta pa Hulanda, cu TIU, riba 30 di juni. Su nieta mester a busca su paspoort dia 30 di juni, pero door di e decreto di gobierno, tur oficina di sector publico a keda cera. Nan a purba bay na oficina di Censo diaranson, prome cu merdia, pero ya caba e luga tabata cera prome cu 11:30am.
Esaki sigur tabata un baño di awa friu pa Kock, ya cu e ta esun cu a sali perhudica, ya cu e no por cambia su ticket y lo mester a cumpra pasashi ful di nobo. Pero asina mes, TIU a haci un excepcion p’e y a ponenan riba wachtlijst p’e fin di siman aki. Segun Kock, e mester a paga 380 florin extra, pa e tabata riba standby pa diasabra of dialuna.
Tambe Kock a bisa cu e ta hopi decepciona cu henter e sistema na Aruba. Un otro opcion ta cu su nieta lo mester bay su so riba avion, lo mester paga un pasashi extra.
Prome cu Censo nan tabata tin un otro afspraak, pa cual nan no por a bay Censo mas trempan pa busca e paspoort.
Pa Kock, esaki ta un inhusticia! Nan a kita 380 florin for di un persona cu no tin, cu ta lucha pa biba. E kier su placa bek, e ta bringa pa su derecho! E no kier pa e caso aki bay asina leu cu mester bay abogado.
Unico cu e ta pidi, ta pa nan pag’e su placa bek. Nada mas.
