E presidente Venezolano, Nicolas Maduro,a ofrece pa negosha cu oposicion “na interes di paz y e futuro di Venezuela.”
Pero e eleccionnan si no lo bay yega. E peticion di e otro paisnan e ta yama chantahe. Den un entrevista cu e agencia di prensa estatal Ruso, RIA, el a bisa: “Si e imperialistanan kier eleccion, nan tin cu warda te cu 2025.”
Mientras tanto, oposicion ta purbando pa aumenta e presion riba Maduro pa e renuncia. Diaranson ultimo tabata tin manifestacionnan grandi. MIles di persona a muri durante e protestanan y cientos di nan a wordo aresta.
E lider di oposicion Guaido, presidente di parlamento, kende a declara su mes como presidente interino, a pidi e Venezolanonan pa sali riba caya y exigi e salida di Maduro.
Medidanan contra Guaido
E conflicto entre e dosnan a bira mas skerpi ainda mas ora cu e Tribunal Supremo, na banda di maduro, a prohibi Guaido pa sali for di e pais. Tambe a haci un peticion di parti di e fiscal, pa vriez e depositonan bancario di Guaido.
Den e entrevista, Maduro a bisa cu e otronan por media den e negociacionnan. El a pensa aki riba Mexico, Uruguay, Bolivia, Vaticano y Rusia.
Apoyo Ruso den forma di danki
E Gobierno Ruso ta apoya maduro y tin interesnan grandi dene pais SurAmericano cu ta den un crisis profundo. Rusia a bisa diamars cu e tabata preocupa pa e miles di miyones di prestamonan Ruso, pendiente cu e gobierno Venezolano.
Debi na e sancionnan Mericano, companianan na Merca no por haci negoshi mas cu e estado petrolero na Venezuela, mientras cu normalmente rond di 40% di e petroleo ta wordo exporta pa Merca.
Den e entrevista, Maduro a sigura cu e lo cumpli cu e obligacionnan financiero cu e creditornan manera Rusia y China.
Tambe el a gradici e presidente Ruso pa su apoyo. “Putin ta apoya nos den tur e formanan posibel y nos ta hopi gradicido na dje.”