Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba veldnan na Pos Chiquito. Den categoria AA Macuarima Spark Elektra a faha duro cu Celebrities kende no kier a baha cabez pa ultimo saca un victoria importante 11-10.
Celebreties a bay ariba 1-0 den promer inning pero mesora Macuarima ta bolter e score 2-1. Den cabez di 2 inning Celebreties ta rally pa 5 careda pero Macuarima ta reaciona cu 4 pa empata e wega 6-6. Macuarima ta tuma ventaha 10-6 pero Celebrities ta reaciona bek cu 4 careda pa empata e wega un biaha mas 10-10. Ultimo Macuarima ta logra score e careda di victoria. Boxscore final Macuarima 11 careda, 9 hit, 2 error y ta laga 7 coredor na base. Celebrities 10 careda, 9 hit, 3 error y ta laga 6 coredor den circulacion.
Mihor bateadornan pa Macuarima ta Darl Quandus di 1-1 cu 3 rbi, Javier Croes di 3-3 incluyendo un triple cu 3 careda anota mas 3 impuha, Edgar Flanegin y Jean Pierre Geerman di 2-1, Ray Bernabela di 3-2 cu 2 rbi y Juan Chirino di 1-1. Pa Celebreties a destaca na plato Ruwin Tromp 2-1, Joward Croes 4-2, Joshua Wever di 4-2 cu 3 rbi, Albertico Noguera di 3-2 cu 2 rbi. Lucio Geerman ta bay 3 inning y 2 tercio enfrentando 24 bateador tirando 31 bola, 47 strike pa un total di 78 lansamento permitiendo 10 careda di cual 9 ta limpi tras di 8 hit ponchando 1 bateador y ta regala 2 base por bola y no ta haya un decision riba su nomber.
Juan Chirino ta tira un solo inning ta bay cas cu e victoria riba su nomber. Jeremy German ta permiti 11 careda di cual 9 ta limpi den 27 bateador cu el a enfrenta pa bay cas cu e derota riba su nomber. Rudy Angela ta drenta releva ultimo inning. Dialuna Celebrities y Jay’s Tire lo midi forsa den categoria AA na veldnan na Pos Chiquito. Fanaticada yega tereno bin apoya Bo equipo preferi.
