Luigi Bergen ta siguiente candidato pa puesto di Parlamentario

Despues di anuncia su retiro inmediato awe mainta, Sue-Ann Ras ta habri caminda pa Conseho Electoral acerca e siguiente candidato di MEP, segun secuencia di lista, pa acepta e puesto di Parlamentario. Despues di Ras, e siguiente den liña lo ta Luigi Bergen. Puesto di Parlamentario ainda ta bay segun number riba lista y no segun cantidad di votonan logra den e ultimo eleccion.
Siendo un docente na Colegio EPI, Luigi Bergen tabata candidato number 16 riba lista di MEP na aña 2017 y a haya cu 237 voto riba su nomber. Si e logra drenta Parlamento, e lo ta e di dos Parlamentario cu menos voto di MEP, debi cu e record awo ta di Daphne Lejuez cu solamente 196 voto. E Parlamentario cu menos voto den henter Parlamento di Aruba ta Michael Lampe (AVP) cu unicamente 118 voto.
Sinembargo, Luigi Bergen no ta pasando den e miho temponan di su bida personal actualmente. E proceso di separacion for di su señora ta bayendo cu bastante turbulencia. Di tal indole cu e señora a publica combersacionnan via whatsapp riba Facebook, mustrando publico cu Bergen tabata infiel y a bandona cas, lagando su yiunan desamapara atras. Un entrada awor aki den Parlamento lo por bira un reto pa partido pasobra e problemanan personal lo bin cune tambe. Bergen a campaña hopi pa elimina schoolgeld y kita aircogeld for di mayornan pa yiunan por bay scol sin gasto. Pero MEP no a haya e cartera di enseñansa y como tal el a bay traha como Consehero di Minister Chris Romero awor den Ministerio di Transporte Publico y Comunicacion. Bergen a haya varios funcion den fundacionnan y companianan estatal pa representa interesnan di Gobierno.
E siguiente den liña, den caso cu e problemanan personal di Bergen ta un obstaculo pa lage subi escenario publico awor aki ta Darlaine Guedez cu a haya 525 voto riba su nomber, mas cu hopi Parlamentario di MEP actualmente. E ta hopi keto si y menos popular cu e otronan, pero a haya mas voto si.
Si voto ta locual mas ta conta pa MEP, e ora e candidato lo mester ta dr. Arthur Vallego, candidato number 29 cu a logra un cantidad di 972 voto personal. Pero pa e asumi e funcion, candidato number 17 te cu 28 lo mester nenga e puesto prome, un trayecto largo y casi imposibel pa logra mirando e tendencia di ultimo añanan cu e politiconan nobo di awendia. Si esey lo tabata factibel, lo mester a logr’e na october 2017 caba ora a forma Gobierno pero lamentablemente no tabatin boluntad politico p esey. Vallego a bay traha como consehero di Minister Oduber pero a muri politicamente tambe dor di su silencio y desaparicion for di e escenario publico y di politica.
Mester menciona cu aunke e cambio di Parlamentario por mustra un asunto masha facil, e realidad ta cu tin hopi mas factor ta hungando un rol. Por ehempel den gangnan na Cocolishi ta menciona di un Minister di MEP cu ta evaluando pa bandona su funcion y lo tin interes pa drenta Parlamento bek. Cu e scenario nobo awor di Ras bandonando Parlamento, e tin e oportunidad ideal pa drenta Parlamento y si acaso un Parlamentario lo ta interesa den e funcion di Minister, ta un cambio mas facil pa haci. Tur esey directiva di MEP lo mester delibera riba dje awo, pa por sigui padilanti.