“Mañan lo mi huramenta como Parlamentario y lo forma parti di e Parlamento di 2019-2020 y mi ta kere esey ta hopi exitante”, esey tabata e prome palabranan di Luigi Bergen awe den Parlamento. E no a huramenta ainda y como tal no tabata sinta den sala cu su coleganan. El a bisa di a scucha e discurso di Gobernador cu masha atencion y e ta consciente di e retonan cu tin den economia, finansa publico y mas.
Un parti cu a hala su atencion hopi tabata e aspecto di enseñansa. Pa Gobernador, formacion di nos hobennan ta keda e motor den enseñansa, pa cual e ta sinti como un educador, cu e lo por duna su aporte. E lo enfoca mas riba enseñansa. Aunke e ultimo dos añanan el a conseha Minister Chris Romero, pues e tin amplio conocemento riba aspectonan economico y cu enfasis riba sector primario, pues nan por conta cu su sosten.
Un otro aspecto cu el a traha di cerca cune e ultimo añanan den su rol di coordinador ta pa bienestar di San Nicolas. E ta comprometi pa for di Parlamento, pa sigui empuha riba e proyectonan cu lo tin un efecto positivo riba progreso y desaroyo di San Nicolas. Den esaki San Nicolas Port Authority ta e liña cora den progreso pa San Nicolas pero pa Aruba henter tambe.
Como cu e ta bisa di lo aporta mas den enseñansa, a puntr’e si e ta siguiendo e ultimo desaroyonan den e sector aki, mustrando di ta bastante controversial. Riba esaki Luigi Bergen ta kere cu mas cu djis retonan den enseñansa, cu mayoria di e supuesto problemanan ta fomenta dor di media, pues cu nan no ta real. Den mayoria caso e ta mira cu e Minister ta atende cu e docentenan y tur cos ta calma, pues hopi “storm in een glas water”.
Na final, Luigi Bergen a sigura cu pa loke ta e keho penal cu su casa a entrega na Polis, acusand’e di violencia domestico cu su yiunan den cas, el a refuta totalmente. El a bisa cu ta un asunto priva y a pidi pa tene cuenta cu privacidad di su yiunan. E hecho cu el a su declaracion di bon conducta for di Ministerio Publico ta base cu no tin ningun caso penal contra dje na e momentonan aki.
