E siman aki tin dos conferencia internacional riba e tema di marihuana, un ta na Missouri na Merca y e otro na Canada. Dos miembro di Parlamento a opta pa biaha, pa dos diferente pais y diferente conferencia. E diferencia ta: Ricardo Croes a paga for di su mesun saco mientras Luigi Bergen a biaha riba cuenta di Parlamento. E hecho cu pueblo ta paga pa e conferencia aki awor ta percura pa critica den comunidad, specialmente pasobra Gobierno ta riba un racha di cortamento di gasto tur caminda, incluyendo overtime di ambtenaarnan.

Durante ambos conferencia, ta repasa e bentahanan y desbentaha cu e industria aki ta trece cune. Varios pais y ciudadnan grandi ya a legalisa e uzo medicinal di Marihuana, mientras cu otronan a legalisa of ta hibando un maneho menos estricto riba e uzo recreacional. Hulanda por ehempel ta un pionero den Europa pa e maneho conoci como “gedoogbeleid” pa loke nan ta yama “softdrugs”.

Sinembargo, aki na Aruba ta nota interes politico y comercial rond di e tema aki. Hasta tin politiconan cu ta mustra masha interes den e tema, debi cu personalmente nan ta envolvi den negoshinan rond di legalisacion di marihuana pa nos pais. Por ehempel, Ricardo Croes desde hopi aña caba ta un di e promotornan prominente pa cu legalisacion di marihuana na Aruba, tanto medicinal como recreaconal. Y e ta promove esaki publicamente y hasta a logra cu el a bira parti di e acuerdo di gobernacion entre e e coalicion di MEP-POR-RED firma na 2017.

Ricardo Croes a crece di 420 voto na aña 2013 pa 3359 voto den eleccion na aña 2017. E ta e politico cu a crece mas den voto durante e ultimo eleccion y ta e di tres “votegetter” di Aruba den eleccion 2017 despues di Mike Eman y Evelyn Wever.

Asina mes cu tin un acuerdo entre partidonan di coalicion, ya caba na tres diferente ocacion, e partnernan MEP y POR a lag’e cay den Parlamento ora cu el a purba pasa un mocion pa urgi Gobierno pa pasa e leynan corespondiente mas pronto posibel. Tur tempo nan a bis’e cu e “timing” no ta corecto y cu lo purba despues. Ta parce cu si despues no ta yegando nunca.

Mientras cu Ricardo Croes di RED ta expresa su mes publicamente riba e tema, otronan ta moviendo den silencio, al estilo “incognito” riba e mesun tema aki. Un di esunnan moviendo den sombra ta e Parlamentario nobo, Luigi Bergen di MEP. Tin un famia directo di dje cu entretanto a inscribi e compania Indi-Vital Existence & Resources VBA na Camara di Comercio na juni 2019. Esey tabata tempo cu e tabata consehero di Minister Chris Romero, e tabata pusha duro pa e ley aki, pasobra e tin interes particular y personal, via un famia directo, pa e negoshi aki!

Luigi Bergen a crece di 187 voto den eleccion 2013 pa no mas cu 237 voto durante e ultimo eleccion, na 2017, cu partido MEP. El a drenta Parlamento algun siman pasa, na salida di Sue-Ann Ras, despues cu e ultimo aki a tuma su retiro na cambio di aña Parlamentario.

Cu e interes politico pa e tema aki ta grandi ta bisto. E siman aki so dos Parlamentario ta den exterior atendiendo dos diferente conferencia riba e mesun tema. Esey ta mustra cu kier trece experencia di otro paisnan of ciudadnan grandi, cera contacto cu inversionistanan y mira e formulanan di negoshi disponibel, pa por aplica na Aruba tambe. Di e forma aki asina cu e ley pasa den Parlamento, por canalisa e proceso riba un velocidad mas halto.

Pero e diferencia ta: mr. Ricardo Croes di RED a opta pa paga su mesun pasashi y estadia na Merca pa e bay atende e conferencia. Den caso di Luigi Bergen, un miembro di Parlamento nobo, el a pidi pa cambia un reunion di Parlatino, pa e haya e placa cu lo a paga pa e bay e reunion, pa asina e atende e conferencia na Canada, cu ta costa mas placa cu e reunion Parlatino. Asina mes Parlamento a bay di acuerdo cu su peticion pa e biaha den Business-Class pa atende e reunion aki, cu e ta considera asina importante pa nos pais.

Aki ta bisto cu e interes di e dos Parlamentarionan ta diferente, pasobra esun ta sali di su mesun saco y e otro ta ricibi placa di pueblo. Mirando cu Luigi Bergen tin interes personal den e industria di Marihuana, ta considera cu e mester a pag’e di su mesun saco pa bay atende e reunion aki. De facto, e tipo di movecionnan asina aki ta crea duda y un percepcion di “conflicto di interes” cerca un miembro nobo di Parlamento.

Tanto a bisa cu lo no atende reunion di Parlatino pa motibo di Benny Sevinger, por mira cu den MEP mes a opta pa interes personal ta bay prome cu interes politico y a opta pa toch biaha pa un negoshi “personal”.

Comments

comments