E hoben Luisann “Lui” Larez, naci na Aruba dia 8 di december 1999, pues di apenas 20 aña di edad, ta luchando pa su bida den unidad di cuido intensivo na Hospital. E tabata e otro victima envolvi den e accidente pisa ayera nochi na Sero Pita, den cual un Polis a fayece na e sitio. Ta den su auto e Polis a bay dal, ora el a pasa un auto sortiando pa bay man robes.
Na e sitio a presenta tres Ambulance pa por brinda asistencia na e victimanan. Dos auto a dal frontal den otro, y ambos chauffeur a resulta herida y un di nan a hasta keda pega den auto, pa cual Bomberonan riba Materialenwagen a presenta pa corta e auto pa libera e victima.
Na e sitio caba Paramediconan riba Ambulance a nota cu un di e victimanan, cu despues a resulta di ta un Polis na civil den su auto priva, no tabata duna señal di bida. Pero den e auto cu tabata bin como trafico contrario, e chauffeur tabata den un estado critico. A purba stabilis’e na e sitio mes den Ambulance pero mesora despues a sali cu ne cu urgencia pa Hospital.
Ey Dokternan specialisa den atende pashentnan di trauma tabata sperando riba dje. Den e departamento di Spoedeisende Hulp a brind’e prome tratamento, pero masha lihe Dokter a tuma nota cu su situacion ta mas serio ainda y ta rekeri atencion special y urgente. A hib’e den Cuido Intensivo unda a logra stabilisa su situacion, aunke e ta hopi delicado. Ta menciona cu mester spera 48 ora pa mira con su curpa mes ta reacciona riba tur e sla ricibi.
Manera ta conoci, e dos autonan cu a del den otro ta un Suzuki Swift color blauw cu a dal frontal den un Nissan March color licht biña. Ta autonan chikito den cual e chauffeurnan ta exponi directamente na e impacto, den caso di un accidente semehante den cual probablemente velocidad halto a hunga un rol.
Lui Larez di 20 aña di edad tabata traha un tempo na Aeropuerto y despues na un restaurant. Obviamente awo e ta na cas sperando reapertura di e restaurantnan pa por cuminsa traha atrobe. E ta biba na Santa Cruz, pues mirando e ruta, probablemente e tabata caminda pa cas.
Su mama a manda un mensahe mainta na tur su amistadnan suplicando pa oracion pa su yiu muhe. “Famia y conocinan, amigo y amiganan di Luii Larez. Ban resa pa mi yiu cu a haya accident ayera nochi y cu ta den intensive care luchando pa su bida. Cu e dolor aki mi no tin palabra pa splica. Pero si por pidi pa nos tur ban ora pe”.
Mientrastanto e investigacion na e sitio a sigui te den oranan laat di marduga. E departamento di trafico di Polis ta conduciendo e investigacion hunto cu e ekipo Forensico di Polis, mientras cu companianan di seguro tambe ta hopi cerca di e investigacion. Na final ta e compania di seguro lo mester dicidi cua partido ta cubri, y si ta cubri completo of parcialmente. Puntonan cu por hunga un rol den cual seguro por desvia di e cobertura ta entre otro si partido(nan) tabata bou influencia di alcohol.
E situacion di Coronavirus ta haci henter e asunto aki ainda mas fastioso y doloroso pa famia pasobra pashentnan interna den Hospital no por ricibi bishita of sino masha limita. E distancia den un momento asina crucial pa e pashent, den cual pa un rato Bo ta entre bida of morto, ta laga un bashi enorme memey. Pero nos ta confia cu nos bon Dios lo obra por medio di e mannan milagroso di nos Specialistanan den Hospital mescos ta e cuido yena di amor cu e nursenan ta brinda na pashentnan interna. Cu oracion di nos tur, pronto Lui lo ta recupera.
