Tabata diasabra anochi, algun minuut prome cu Toque de Queda cu a sosode un accidente serio na Sero Pita. Un agente di Polis a bay pasa un auto cu tabata sortiando y a dal frontal den trafico contrario. E Polis a fayece na e sitio mes, mientras cu pa 6:00pm, Cuerpo Policial a confirma cu e chauffeur di e otro auto, esta Luisann “Lui” Larez, naci na Aruba dia 8 di december 1999, pues di apenas 20 aña di edad, tambe a fayece na Hospital. E no a logra sobrebibi tur e slanan ricibi durante e impacto.
For di momento cu el a yega Hospital, a pasa cune den e unidad di Cuido Intensivo pa por a purba stabilis’e, pero sin mucho exito. Specialistanan a bisa mesora cu e prome 48 oranan tabata crucial den e proceso di purba scap’e. Awe tardi, den e 48 oranan ainda, Lui a perde e bataya y a fayece.
Lui Larez di 20 aña di edad tabata traha un tempo na Aeropuerto y despues na un restaurant. Obviamente awo e tabata na cas sperando reapertura di e restaurantnan pa por cuminsa traha atrobe. E tabata biba na Santa Cruz, pues mirando e ruta, probablemente e tabata caminda pa cas.
Na su mayornan, famia y amigonan, nos ta expresa palabranan di hopi forsa den e momentonan dificil aki. Cu Lui sosega na paz.
