Aruba merece di tin experiencianan den shopping, manera esun cu D-Shop ta trece. Esey ta loke cu Diana Helder a comenta despues di e soft opening na nan localidad nobo riba Sasaki.
Cu añanan e competencia pa retail a bira mas duro. No entre nan mes na Aruba, pero mester competi mundialmente. Social media a take over y tin pa mehora e parti ey pasobra ta competi cu tur e tiendanan grandi di mundo. Si kier sigui riba mercado, mester mehora, esey ta un deber, el a bisa durante e apertura.
No ta facil
E Proyecto aki, e ta consider’e un paso hopi grandi. Segun Diana, e no ta facil, vooral retail. Retail ta luho. E ta kere fielmente cu si bo drecha, si bo haci experiencia di shopping dushi pa un persona, bo clientenan ta keda fiel na abo y nan ta bay keda bin cerca bo. Nan sa cu bo ta haci’e pa nan. Bo ta haci’e pa nan tin un rato leuk ora nan yega bo tienda y cu nan kier basta tempo eyden. Esey ta e intencion.
E deseo y un soño
Diana a cuminsa for di scratch cu e localidad aki. E tin tres aña y mey mas of menos cu e proyecto aki y tabata un caminda largo, pero cu hopi cambio na caminda. Pero a make it happen. Loke D-shop ta, ta Diana, loke semper cu kier a ilustra cu D-Shop ta.
Lo ultimo
Ora cu bo drenta den D-Shop, ta manera bo ta drenta den un mall sea na Merca, Colombia of Europa. Y esey ta loke kier a trece for di masha hopi tempo pa Aruba y a logr’e. E feedback cu a haya for di e publico den fin di siman tabata uno fantastico y grandi. E acogida tabata tremendo. Esey ta un push pa por sigui mehora y sigui pusha bo mes pa bo bay cada dia mas leu.
Apertura oficial
E luga ta yena di cliente y no solamente local, sino turista tambe. Segun Diana, e paso cu a duna ta cu tabata kier ta mas cerca di turismo tambe, unda cu tin un area mas trafica pa turista. A logra esaki. Ta haya basta bishita den e dianan aki di turista. Nan ta haya e tienda masha bunita mes y great, pero tambe diferente. E turistanan ta comenta cu nan ta sinti nan mes na Europa of New York. Pa nan esaki ta un complement grandi y e hecho cu nan ta riba Sasaki, ta tremendo pasobra nan ta cerca di un di e supermercadonan mas grandi di Aruba, cu ta haya hopi turista y dilanti di e hotelnan tambe.
Kico mas por spera
D-shop no ta cla ainda. Pa mita di december, lo bay haya cu Juan Valdez lo join nan den e di dos piso. Nan lo tuma 50 meter cuadra y lo duna servicio manera nan sa duna den otro localidadnan na Aruba caba. Ya tin e concepto mas di loke nan tabata kier a haci for di comienso. Otro aña lo bay bin cu Home & Decor den nan di dos piso. Por ta nan tin un Prosecco Bar den un futuro cercano tambe.
E secreto di D-shop
E dama y cabayeronan ta gusta bin shop na D-shop. Segun Diana, p’e semper ta hopi importante di trece y di tin su clientenan na altura di loke ta pasa den moda na nivel mundial. Pa siman nan tin stock nobo. Ta ricibi sapatonan di Brasil tur luna. Moda ta cana hopi lihe y no por keda atras. Mester core riba e mesun speed cun’e.
Y sin conta e pañanan. Tur siman tin items nobo. A agrega tambe entre otro Studio F, un di e marcanan mas grandi di Colombia pa loke ta paña. Tambe tin Perry Ellis di Hende homber. Pa esnan cu no sa, tin paña tambe pa hende homber.
Orario di D-shop
For di basta tempo clientenan ta pidi pa extende e orarionan pasobra e orarionan di retail na Aruba ta hopi limita y por ripara cu e necesidad ta grandi pa por duna un servicio extra na nan. Ta bay habri for di 9’or di mainta tur dia te cu 8’or di anochi riba diasabra y riba diadomingo ta habri for di 10’or di mainta te cu 6’or di atardi. E demanda pa diadomingo ta grandi, pasobra esey ta e unico dia cu den e rush life cu nos tur ta hibando, bo no ta haal’e. Bo mester di un extra tempo pa bo por bay disfruta y relax, haci bo shopping den trankilidad.
Te ainda no a busca mas hende, mirando cu ta preparando pa e apertura. D-shop ta situa den Caya Harmonia 8, riba Sasaki, y ta cla pa ricibi un y tur pa bin tira un bista den nan tienda.
