Ta for algun luna caba cu ta tuma nota constantemente di critica riba facebook relaciona cu Dushi Vibe Festival Aruba, den cual Daddy Yankee lo a presenta, ta posponi keto bay. Tur esunnan cu a cumpra nan ticket, ta desea di sea haya un fecha concreto ki dia e concierto ta tuma luga of pa debolbe nan placa bek.
Mayoria comentario ta sea cu e promotor, Louis Luna, no ta reacciona of no ta duna claridad si e hendenan cu a cumpra ticket lo haya nan placa bek. Su clientenan ta sinti nan mes engaña y laga atras sin splicacion. Es mas, debi cu e concierto nunca a tuma luga, e promotor no tabatin ningun gasto. Ta teme cu el a uza e placa pa otro cos y awo no tin e suma mas pa paga e clientenan cu a confia den dje y cu a cumpra carchi pa e festival cu mester a tuma luga dia 4 di april 2020.
Debi na tanto critica, nos reporteronan a staciona den parking lot di bestuurskantoor, unda e promotor ta traha, como consehero di Minister Presidente mr. Evelyn Wever-Croes. E ta encarga cu su maneho di relacionnan publico. Pero, den e asunto aki di debolbe placa di festival, ta parce cu no tin ningun informacion pa e cumpradonan ni splicacion di kico a sosode cu nan placa
Durante un entrevista na su salida di Bestuurskantoor, Louis Luna no a duna claridad si e personanan cu a cumpra nan ticket lo haya nan placa bek of ki dia e concierto lo sigui. E artista principal mester tabata Daddy Yankee, e evento mester a tuma luga 4 di april 2020. Debi na pandemia el a cancela y desde aña pasa niun hende a haya claridad riba e concierto. Aki algun siman lo yega un aña cu e tin miles di florin den su poder di tur cu a cumpra nan entrada pa mira nan artista preferi. Awe el a cana duro subi su auto y a prefera pa no enfrenta e situacion y para pa su concierto y pa e placa cu e tin pa entrega bek.
Unico cos el a bisa ta: “tene pasenshi”.
Por lo menos algun di esunnan cu a cumpra a sigura cu otro siman nan lo para dilanti Bestuurskantoor pa busca nan placa bek, pasobra ta casi un aña sin tende nada, sin haya un notificacion di ki dia e concierto lo sigui of na unda por pasa busca nan placa bek. Mescos cu e concierto aki di Louis Luna, tin mas eventonan cu tabata programa pa aña pasa di cual e promotornan a bende y tuma placa pa e evento y awo ta “spoorloos” y no ta duna cara na nan clientenan. Nos lo pasa bishita tur den e simannan nos dilanti, pasobra na final…nos t’ey pa e pueblo!
