Desde 2012, Lotto, e loterial nacional ta opera pa Canadian Bank Note Aruba (“CBNA”) cu ta consisti completamente di un team local cu ta un subsidario di Canadian Bank Note Company (“CBN”). Cu CBNA su maneho profesional, a logra maximalisa e fondonan cu e loteria ta genera. Desde cu CBNA a asumi maneho, e benta averahe anual a subi cu 10 miyon florin. Asina por sigui brinda e fondonan pa deporte den su totalidad.
Na varios ocasion e mandatarionan ta trece informacion eroneo na pueblo tocante con Lotto ta reparti su fondonan y con CBN ta compensa pa su servicio. CBN y CBNA ta desea pa pueblo ta bon informa tocante e realidad di e situacion. A reparti e bentanan cu Lotto a genera entre 2012 y 2020 den e siguiente forma:
E parti mas grandi di e benta, mas o menos 49%, a bai bek na pueblo den forma di premio. Deporte den su totalidad ta haya 15%. Operacion di e loteria (personal, mercadeo, sorteo, utilidad, etc.) a costa 15%. E 180 rebendedonan cu ta depende di e comission di lotto como entrada, a conta cu alrededor di 11%. CBN a cobra mas o menos 8% pa e tecnologia y maneho cu e ta ofrece y finalmente e loteria a contribui na caha di gobierno cu 2% di su benta en averahe via impuesto. Por verifica e cifranan aki den e cuentanan anual di Fundacion Lotto pa Deporte, cu ta publico.
Manera ilustra aki riba, CBN no ta cobra un suma halto manera e mandatarionan a trece dilanti. Parti di e acuerdo ta cu CBNA ta responsabel pa paga tur gasto di operacion di e loteria, tecnologia y maneho; ta un parti minimo di e 8% cu CBN ta cobra pa tecnologia ta forma ganashi pa CBN. Ta importante pa remarca, cu mas di 90% di e fondonan genera pa e loteria ta keda na Aruba.
CBN y CBNA semper ta purba mantene un bon dialogo cu tur gobierno pa percura cu gobierno ta bon informa y tambe pa hunto purba yega na solucion general na bienestar di Aruba. CBN y CBNA tin solucionnan con pa por crea mas fondo y ta spera cu e proximo gobierno ta habri pa dialogo y colaboracion pa engrandece deporte den su totalidad.
