Tres medaya di brons den un field di 450 landado top di 43 pais di e continente America. Esaki ta e resultado final di e Copa UANA 2020 cu e landadonan Chloe Farro, Braynsly Dirksz, Gavin Kock y Jaydon Croes a bini cune bek Aruba. E cuater landadonan tabata bou guia di coach Ismael Santiesteban y casi tur a kibra recordnan personal den e diferente disciplinanan cu nan a landa den e weekend tras di lomba.
Un trabou duro di luna nan di preparacion a paga cu tres medaya historico pa Aruba na Peru. Dos anja pasa den e prome Copa UANA nos landadonan no a logra medaya mientras den e edicion aki nos landadonan a logra tres medaya. E landado femenino Chloe Farro tabata e prome cu a logra conkista medaya di brons den e 50m free pa despues gana un otro medaya di brons den e 100m free. E hoben landado masculino Braynsly Dirksz ta sera e logro grandi di Aruba na Lima, Peru ora e ta gana medaya di brons den e 100m breast. Nunca antes landadonan di Aruba a logra conkista medaya den un campeonato di e magnitud aki manera a Copa UANA. E cuater hobennan aki ta nos prospectonan y mester duna cada uno e atencion bon mereci.
Lotto, e loteria di Aruba y Stichting Sportsubsidie Aruba kier a manda un palabra di pabien na Chloe Farro, Braynsly Dirksz, Gavin Kock y Jaydon Croes sin lubida coach Ismael Santiesteban, Aruba Aquatics Federation, mayornan y Aruba completo. Stichting Sportsubsidie Aruba ta contento di por aporta y brinda e ayudo na e federacion di landamento, Aruba Aquatics Federation y felicita principalmente e landadonan Chloe Farro y Braynsly Dirksz cu nan logro historico pa Aruba den e UANA Cup 2020 na Lima, Peru.
Lotto, e loteria di Aruba ta ofrece diferente weganan manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana.
Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
