E delegacion hubenil di taekwondo a logra gana e competencia di taekwondo na Corsow pa di dos anja consecutivo. Den e fin di siman tras di lomba e delegacion di taekwondo cu ayudo di Lotto a competi dene famoso shete edicion di e TK5 organisa pa Olympia Taekwondo na hermana isla di Corsow. Nos atletanan a competi contra un total di 4 pais y tabata representa den e categoria hubenil pa e cinco atletanan Rouel Baarh, Nathan Fradl, Hakeem Lowe, Záhyon Klabér y Jourdé Klabér. Guia pa e atleta Olimpico di Rio 2016, Monica Pimentel nos muchanan a logra un tremendo papel ganando di Venezuela den e gran final. Esaki sigur ta un logro tremendo pa e delegacion di Aruba den e deporte di taekwondo den un torneo internacional di taya.
Lotto pa Deporte cu semper a apoya e deporte di taekwondo den tur sentido di palabra kier a manda un palabra di pabien na Sr. Klaber y Stichting Brazil Taekwondo como tambe na e atletanan y coach Monica Pimentel cu e gran logro aki. Aruba sigur por ta orguyoso di nos taekwondistanan cu un bes na planta respet den un torneo internacional.
