Playoff HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a termina den categoria masculino A-Klas. E fuerte equipo di Logros un equipo cu a bira miembro recientemente den aña 2017 di Aruba Softball Bond y a participa den su promer campeonato official y ta logra pasa te final perdiendo un solo wega den henter e campeonato pa asina titula campeon y ta “sweep” e serie final di best out of 5 ganando 3 wega sigui. Den e ultimo wega e muchanan di Blackhawks no kier a entrega y a trata na tur manera pa kita un wega for di Logros pero champagna nan tabata friew friew y weya di sopi di sancocho tabata sacudiendo riba veld di Dragon Hitters enespera e victoria pa por a celebra. Logros ta laga Blackhawks den tereno 11-10 y asina titula campeon pa inicia e celebracion sin fin. Mesora dirigentenan di ASB bow presidencia di Endy Croes a entrega e premionan na tur presente. Champion Pitcher a bay pa Juan Chirinos di Logros cu 7 victoria y 1 derota. Champion Batter di campeonato a resulta Joward Croes di 23-15 cu un averahe di 565 di e equipo di Celebreties. Champion Homerun a resulta Jose Baez tambe di Celebreties cu 5 homerun. MVP di campeonato a bay pa e pitcher Edgar Batista kende a gana tur su weganan den playoff y a faha e ultimo wega cu alma y curason pa logra e victoria di 11-10. Merecidamente e MVP. Premio di Sub Campeon a bay pa Blackhawks, un equipo unda mayoria atletanan ta maestronan di school kendenan ultimo añanan a desaroya y a mehora asina tanto y ta jegando final enbuska di nan promer titulo. Resultado final Logros 11 careda, 9 hit, 1 error. Blackhawks 10 careda, 12 hit, 5 error. Edgar Bautista ta resulta pitcher ganador y Clay Shipley ta bat cas cu e derota. Mihor bateadornan pa Logros ta Alvaro Rodriguez 3-2, Manuel Paula y Edgar Bautista 4-2. Pa Blackhawks a destaka na plato Yeised de Kort 1 homerun, Maikel Fingal y Yerick De Kort di 4-2, Brain Dale 2-1, Edgard Rafael di 4-2. Logros ta promove di imediato pa e categoria mas halto na Aruba esta AA y lo melita den campeonato 2018 den e categoria aki. Pabien na Logros y pabien na Blackhawks cu boso titulo nan. Danki na un y tur cu a pone nan granito di arena pa nos por tabata tin un campeonato A-Klas exitoso.
