Contrario na empleadonan publico, cu mester a entrega 50% di nan “vakantie uitkering” di e luna aki, e empleadonan di Dr. Horacio E. Oduber Hospital si a logra cu no ta baha nan salario (ainda) y no mester ni baha of entrega nan “13de maand” e luna aki. Consecuentemente, Hospital lo paga empleadonan dos luna di salario e fin di luna aki, manera acorda den e CAO cu sindicato ABV. Ta considera esaki un logro importante di e sindicato pa su miembronan, trahando na Hospital, na IMSan, na Respaldo y na casnan di nos grandinan resortando bou di SABA.
Tabata na november 2019 cu ABV a logra firma e CAO nobo cu ta apicabel pa mas di 1300 empleado trahando den e institutonan ariba menciona. Nan a logra cambionan drastico den e beneficio pa e trahadonan, cu a inclui un bonus pa Pasco pero tambe Vakantie Uitkering.
E contracto colectivo firma pa ABV ta diferente na esun cu empleadonan publico tin. Ey nan conoce tres “premie” den aña. Na januari Gobierno ta paga “Bashi Premie’, na augustus ta paga nan “Reparatie Premie” y na luna di november ta paga “Najaars Premie”. Na luna di juni empleadonan publico ta cobra “Vakantie Uitkering” cu ta un luna di salario. Esey ta precisamente locual nan mester a entrega mita pa Gobierno di Hulanda por a yuda cubri henter “payroll” di Gobierno.
Ta parce cu Gina Maduro di ABV a negocia miho pa su miembronan, compara cu otro sindicatonan cu a djis bay scucha Gobierno menciona cu mester baha salario cu 5% pa luna y elimina mita di e “vakantie uitkering” di e luna aki. Esaki mientras cu den gangnan ta menciona cu ainda lo mester corta mas den salario y beneficionan, si nos kier pa Hulanda sigui cubri e gastonan di operacion di Gobierno di Aruba.
Gina Maduro a splica nos cu, den reunion cu Stakeholders, a pone e motibonan dicon empleadonan di Hospital lo ta e ultimonan pa entrega, a firma e carta aki hunto y a mand’e pa Koninkrijksministerraad. Pues Gobierno di Hulanda ta na altura di e situacion aki y cu empleadonan di Hospital, segun Gina Maduro, ta un extra “premie” nan tin regla den nan CAO, cu ta nan “vakantie uitkering”. Pues nan no ta gosa di e mesun beneficionan cu empleadonan publico si tin.
ABV: Empleadonan di Hospital mester ta e ultimonan pa entrega
Ta for di algun siman pasa caba, asina cu Coronavirus a cuminsa afecta nos pais y entradanan di Gobierno a bay na suela, mesora ABV a sali bisa cu empleadonan di Hospital (y den cuido) mester ta e ultimonan pa entrega. El a basa su opinion riba e hecho cu nan ta “first responders” y cu ta na Hospital tur e pashentnan malo sufriendo di Covid-19 ta bay termina. A corda tur hende cu e nurse y dokternan ta pone nan mesun bida na peliger dor di traha cu e pashentnan aki, cu por contagia Bo masha facil y lihe.
AZV a corta mas di 1 miyon florin den Hospital caba
Sinembargo, e realidad awor ta diferente! Gobierno di Hulanda, como condicion pa sigui financia operacion di Gobierno di Aruba, a exigi pa AZV reduci su gastonan di operacion cu 5 miyon florin pa luna. Esey ta un suma cuantioso cu lo no bay sin causa dolor. Un di e gastonan principal di AZV ta Hospital. “Nan a cuminsa corta aki caba. Ya nos a entrega dos luna caba”, asina Gina Maduro di ABV a sigura na nos awe mainta. E reduccion di 5% mensual a traduci su mes den 700 mil florin pa luna, cu Hospital ta hayando menos for di AZV. Considerando cu a corta dos luna caba, pues e suma total cu AZV a spaar na Hospital a alcansa 1.4 miyon florin.
Hospital lo baha su gastonan di operacion
Sindicato ABV a admiti cu nan ta consciente si cu Dr. Horacio E. Oduber Hospital lo mester corta su gastonan, debi na menos entrada mensual for di su unico fuente di entrada, esta AZV. Te cu awor no a yega na e empleadonan, pero ABV sa cu esey lo no dura largo. Na luna di juli caba por spera cu lo bin reduccion den salario, pasobra Hospital lo no por carga e peso di “payroll” sin por conta cu e sosten normal di AZV. Cuanto lo reduci nan salario mensual y/of beneficionan, ainda no ta conoci.
