Localidadnan di Crossfit cu plan y adaptacion strategico pa ricibi su clientenan bek

641

Na momento cu efectonan di Covid-19 a cuminsa afecta Aruba tambe mescos cu otro paisnan rond mundo, e sector di gymnan ta un di e promenan cu a sinti e efecto. For di inicio a duna instruccion pa cera tur caminda cu tin aglomeracion grandi di hende, manera entre otro concierto, fiesta y gym tambe a cay bou di e grupo aki.

Naturalmente ta algo cu a bay di acuerdo cu ne, medidanan ta na bienestar di comunidad y como tal a sostene e decision dor di cera portanan mesora. Muscle & Lungs tambe tin su gastonan, tin empleadonan pa paga, huur di edificio, ultilidadnan y demas. Un yudansa a bin di parti di e propietario di e edificio caminda ta situa mientras a papia cu empleadonan pa bin cu ideanan creativo pa yuda nan den e situacion di crisis.

Localidadnan di Crossfit cu plan y adaptacion strategico pa ricibi su clientenan bek

Localidadnan di Crossfit cu plan y adaptacion strategico pa ricibi su clientenan bek. Click link pa mas https://24ora.news/2X90Cbf

Posted by 24ora on Thursday, May 28, 2020

Will Erasmus ta conta cu di nan banda, for di prome dia caba a cuminsa pensa riba kico lo ta e adaptacionnan y premira kico lo ta rekisitonan cu gobierno lo bin cu ne na momento di reapertura. A cuminsa traha riba un plan con pa logra habri bek teniendo cuenta cu tur cos. Tambe a keda vigila e situacion y adaptacion cu otro paisnan a tuma, manera entre otro na Merca. 

E plan di Muscle & Lungs a bira di “meter cuadra” mas o menos 15 m2. Un espacio specifico lo ta disponibel pa cada cliente, pa asina nan tin nan mesun luga y nan mesun ekipo designa di/pa train. E plan ta diseña pa ningun cliente share ekipo cu otro. 

Un espacio di 15 m2 destina pa cada cliente y un espacio pa e coach caminda el lo por duna les. Den e adaptacion tin e procedura di higiena reglamentario na entrada di laba man pero tambe e parti di cupo regula via cita di orario pa cada cliente cu bishita e gym. Cupo ta limita na e cantidad di training station cu tin actualmente. Cada un di nan ekipa cu productonan di higiena ( cleaning station ) disponibel pa cada cliente uza durante nan training. Na inicio y na final lo guia e cliente tambe pa haci ekipo limpi pa e sigiuente persona cu lo tin cu bay uz’e.

Cambio y adaptacion na e “Normal Nobo” no ta algo straño pa Muscle & Lungs. Ta conoci cu semper nan proceduranan tabata basa riba algun di e puntonan aki. Nan semper tabata traha cu afspaak pero e cultura di nos Iisla no tabata gusta mucho e sistema aki, aunke na otro paisnan esaki ta regular cu ta via cita tin cu traha. Awo esaki ta habri e oportunidad pa reenforsa e sistema y lag’e traha un poco mas estricto mirando cu e ta hopi mas safe.

Erasmus ta premira un ampliacion di e gym den un normal nobo caminda por brinda miho servicio, mas sigur y dirigi na cada persona individual cu mas atencion den un espacio speficio/propio. Ta mira si cu entrada lo bay baha debi na e gastonan extra di higiena y ekipo y ta algo cu lo bay monitoria di cerca. Di otro banda ta hayando ayudo di gobierno y lo mira e banda positivo pero pa futuro lo tin cu tene na cuenta e adaptacionnan y amplia e gym pa por tin mas cupo pa cliente.

Mientrastanto clientenan ta ancioso, no di awo pero di luna pasa caba, pa e gym habri bek. A keda motiva y tene clientenan activo cu online training pero tur hende sa cu no ta igual. Nan kier bay nan gym bek y esaki porfin a tuma luga. Alegria total ora a ricibi nan bek. A mantene nan altanto di e cambionan, a manda nan algun detaye chikito di cual nan a sostene sigur y ta gradici cada un pa e confiansa y e reaccion positivo te cu awo.