Ayera nochi Prome Minister Evelyn Wever-Croes a informa cu Aruba ta drentando un fase nobo, unda ta cuminsa traha cu un “Strategia di salida” cu mester desaroya y implementa pa saca Aruba for di e crisis di COVID-19. Pa Aruba sali for di e crisis ta necesario pa comercio y otro instancianan cuminsa funciona atrobe. Pero esaki mester sosode bou di condicionnan cu ta reduci e riesgo pa transmicion di e virus.
Na e momento aki e strategia cu Gobierno a scoge pa maneha COVID-19 na Aruba ta dunando resultado y ta importante pa sigui monitor y ahusta e strategia unda ta necesario. Ta hopi importante pa desicionnan cu ta tuma ta a base di datonan y no a base di sentimento of presion externo.
E prome paso pa saca Aruba for di e crisis aki ta encera pone nos economia interno cuminsa move. Poco poco tur instancia y negoshi ta cuminsa funciona y hendenan lo cuminsa traha bek. Esaki lo sosode den fase y cu condicionnan. Di e manera aki nos ta inicia e proceso pa recupera economia y futuro di Aruba.
Gobierno ta cumpli cu su tarea pa evalua cada scenario pa garantisa cu cada desicion ta resposabel. Pero e desafio mas grandi ta nos comunidad. Nos comunidad mester tin e sentimento di responsabilidad propio pa cu cuido di nan salud na tur momento. Comunidad mester bira mas consciente di cada situacion y scenario den nan bida diario y evalua nan desicionnan a base di e risico pa contrae e virus.
COVID-19 lo no disparce for di e mundo aki mas y tanten cu no tin un vacuna pa e virus, nos tin pa sigui biba protehando esunnan mas vulnerabel pa e virus. Higiena di man lo bira un actividad frecuente y aglomeracion di hende lo mester regla na tur momento cu distancia fisico di 2 meter.
