Lo otorga asistencia pa investiga casonan di corupcion

Siman pasa miembronan di Parlamento di e comishon di asuntonan hudicial, a reuni cu Minister di Husticia. Topico di e reunion tawata e desaroyo di e protocol di RST. Tabatin representacion di mayoria Fraccion den Parlamento cu a sinta cu Minister, Procurador General, Hefe di RST, Alto Comisario di Polis y Directo di Siguridad Nacional.

PROTOCOL DI RST

Manera ta conoci algun luna pasa tur fraccion den Parlamento a bay di acuerdo cu Minister di Husticia su ponencia pa no firma ningun protocol durante JVO. Motibonan pa cu esaki tawata cu no tawata tin claridad riba diferente aspecto cu ta regarda autonomia hudicial di pais Aruba. Specificamente topiconan manera comparticion di informacion, tareanan specifico di RST, e rol di Ministerio Publico Arubano y Cuerpo Policial.

DESAROYO POSITIVO

E delegacion cu a compaña minister mr. A. Bikker tawata consisiti tambe di funcionarionan Hulandes. Nan a sigura cu a yega na otro riba e puntonan di preocupacion y cu e protocol nobo lo respeta procesonan y reglanan local existente. Pronto lo presenta e protocol nobo na Parlamento dentro di e comishon pa “toets” e sentimentonan di Parlamento.

ASISTENCIA HUDICIAL CONTRA CORUPCION

E delegacion a duna di conoce tambe cu e asistencia cu pais Aruba a puntra pa por investiga diferente casonan penal di corupcion lo wordo otorga. A compronde cu e proceso ya caba ta wordo encamina pa e asistencia necesario yega Aruba.

PA CONCLUI

Rocco Tjon, cu ta Presidi e comishon hudicial a termina bisando cu e desaroyo pa cu e protocol y e asistencia ta positivo. E siman aki lo reuni cu Minister di Husticia riba e maneho di admision (toelatingsbeleid).