Ministerio Publico a emiti un instruccion nobo pa ora di violencia den relacionnan. Procurador-General di Aruba, mr. Alexander van Dam a firma e instruccion nobo aki awe. E instruccion ta contene e reglanan pa investigacion y persecucion ora di violencia den relacionnan amoroso. Tene cuenta cu e instruccion ta conta pa tanto hende homber como hende muhe!
E ta encera tambe e condicionnan basico pa e cooperacion entre Polis, Ministerio Publico, Reclassering y otro partnernan den e sector social y di cuido, cu ta reuni den e Veiligheidshuis.
E instruccion tin cu aporta na trabao mas efectivo y eficiente di tur e partnernan hunto como reaccion riba violencia den relacion. Ademas e instruccion ta sirbi como herment pa reconoce violencia den relacionnan miho, pa stop violencia of stop e menasa y garantisa siguridad di e victimanan.
Lamentablemente Ministerio Publico tin cu constata cu na Aruba tin violencia den relacion na gran escala. E ta un problema social. Varios biaha comunidad di Aruba ta wordo geshock pa casonan di violencia den relacion cu hechonan castigabel serio.
E solucion di e problema aki ta exigi un trabao conhunto y riba termino largo di tur e partnernan. Ora ta trata di preveni violencia den relacion, ta na e instancianan den sector di cuido y social y den enseñanza pa sali na cabes.
Ley Penal ta den e acercamento aki e ‘ultimum remedium’ pa castiga esunnan cu haci nan mes culpabel na violencia domestico.
E señal cu Ministerio Publico kier manda na comunidad cu e instruccion nobo aki ta cu violencia den relacion mester stop y cu lo castiga e acusadonan!
Pesey e punto di salida ta cu den casonan di violencia den relacion den cual ta yama Polis, mester detene e sospechoso y (si ta posibel) e mester keda den detencion. Esey tambe si e victima no kier haci denuncia of trek in denuncia despues.
