Famia y amigonan a bin ta haciendo e preparacionnan pa transporta e curpa di Adelso Sandoval Castellanos pa Colombia. Adelso ta e persona cu a perde su bida dia 15 di juni ultimo na Dos Playa na momento cu e tabata keiro.
E deseo di famia ta pa Adelso sosega na Colombia pa cual su amistadnan aki bou a haci tur e preparacionnan pa manda e curpa di Adelso pa su pais, pero esaki ta tuma un tiki di tempo.
Mientrastanto 24ora.com a haya e informacion oficial di loke cu a pasa e dia aki, cu ta diferente di e melding cu a drenta na prome instante. E caso no tabatin nada di haber cu e prome informe, melding, cu ta trata di un hende cu ta perdi pa hopi dia caba.
Nan tabata tres persona tabata keiro ey tras cu un cacho. Despues cu nan – Adelso, Magaly y dr. Parra – a caba di keiro cu e cacho, Adelso hunto cu dr. Parra, kende ta un familiar di dje, tabata combersa para den e awa, mientras cu e cacho tabata coriendo rond. Dado momento e resto di un ola a yega cerca y a lastra nan pa canto y djei chupa nan bay den lama. Dr. Parra a lucha contra e coriente tratando di yuda su amigo y despues di mas o menos 10 minuut el a logra sake for di awa y a cuminsa mesora cu reanimacion. A pidi un persona cu a yega cerca pa haci nan e fabor di bati alarma cerca autoridadnan.
Na momento cu Paramediconan a yega na e sitio, a constata e mesun cos cu dr. Parra, cu ya caba Adelso a fayece. No tabatin forma pa yud’e mas. Helicopter cu a yega na e sitio mester a transporta e curpa sin bida pa kazerne, mas o menos 2 ora despues di e sucedido, ya cu tabata dificil pa auto di funeraria yega te na Dos Playa. Adelso tabata practica Capoeira cu ta un estilo di arte marcial Afro-Brasilero cu ta combina elementonan di baile, acrobacia y musica. Un biaha mas nos kier manda palabranan di condolencia na famia y amigonan di Adelso pa e dolor inmenso cu nan ta pasando aden.
