Departamento di Cultura Aruba, bou auspicio di Ministerio di Cultura Aruba ta presenta e Encuentro Nacional Multicultural Aruba 2022 cu participacion di Cuerpo Consular y Gruponan Artistico Folklore-Cultural estableci aki na Aruba y hunto cu Fundacion Lanta Papiamento.
Esaki ta e di dos Encuentro Multicultural Aruba 2022 cu ta un evento relaciona cu e celebracion di dia 21 di mei 2022 cu ‘Dia Mundial di Diversidad Cultural pa Dialogo y Desaroyo’ aproba na 2001 pa UNESCO y declara pa Asamblea General di Nacionnan Uni, cual tabata e Resolucion # 57/249 di december 2002.
Riba e dia aki di 21 di mei tambe ta fecha cu nos idioma Papiamento a keda oficialisa na 2003. Mas cu claro e ta un fecha special di Celebracion di Oficialisacion di Papiamento 2003-2022.
Varios pais y Aruba ta participando cu entusiasmo halto cu nan presentacion y gruponan artistico y folklore cultural pa duna contenido na un actividad importante asina.
E evento aki ta tuma luga diasabra 21 di mei 2022 for di 6:00 pm na Cas di Cultura. E lema bunita y importante di Hubert O. Lio Booi d.f.m., kende tabata e prome hefe/director di Instituto di Cultura Aruba cu ta: “Pone e Arubiano na altura di su cultura y siñ’e conoce di otro” ta cuadra cu e meta di proyecto aki. Interes ta hopi halto cu nos por bisa cu ya no tin caarchi mas pa e anochi aki.
Departamento di Cultura Aruba ta gradici Cuerpo Consular, gruponan Artistico Folklore-Cultural, Fundacion Lanta Papiamento, boluntarionan y su empleadonan pa realisacion di otro encuentro multicultural Aruba 2022 cu ta un exito relaciona cu Celebracion di “Dia Mundial di Diversidad Cultural pa Dialogo y Desaroyo”.
