Un biaha mas a bolbe haya un situacion bastante tristo. Despues di a haci investigacionnan hunto cu trahadonan social, Lisette Gomes, di Fundacion Lisette Gomes a bin saca afo di e situacion di e famia particular.
Ta trata di un mama cu un yiu menor di edad den un situacion basta tristo. E cas mes no ta den mucho bon estado pa biba den dje, pa loke ta higiena. Tin porta y bentananan kibra. E señora no tin practicamente nada den e cas. No tin stof, e frigidaire no ta fria. Ta un situacion cu a yega asina pa motibo cu el a perde trabao den pasado y el a cay den un depresion basta pisa. Awor aki e ta sinti cu e ta den un buraco cu e no por sali mas.
E ayudo
Gomes a comenta cu e dama mester casi tur cos den e cas, cuminsando pa porta, bentana, stof, frigidaire, un cama cu su corchon adecuado, diferente articulo di cas, pa por cuminsa di nobo. E señora ta buscando trabao y ta inscribi na DPL y ta sperando riba esaki. E situacion no ta mucho bon na cas y e momento di desesperacion a dal’e cu el a pidi ayudo na e fundacion. “Como ser humano semper ta saca un man yuda, vooral ora cu tin mucha envolvi,” Gomes a bisa.
Con pa contribui
Gomes a comenta cu por contribui via nan pagina di Facebook. Ta bezig cu Fundacion Mi Voz ta bo Voz y tambe Fundacion Lisette Gomes. Por yama na 5629820 of 5661345 y por duna detaye di por ehempel midi di porta, midi di bentana. Y si tin un contratista cu kier bay, por topa cun’e pa e wak e situacion, wak con leu e por yuda y tambe ta bay tin mester di cuminda. Tin cu corda cu e dama ta cobra onderstand, pero ta yega pa paga practicamente casi nada pa e cas, awa, coriente, etc. Prome cu mita di luna ya no tin placa pa cuminda. Esey tambe ta loke ta pidi awo y lo yuda e dama aki tambe, tanten cu e ta un trabao pa e para bek riba su pia.
Pa awor aki lo necesario ta cuminda y tambe loke ta di suma urgencia, mirando cu e cas ta den un situacion deplorabel y e situacion riba su mes ta uno dificil.
