Linda Orman: Falta di comunicacion a hunga un rol na yegada di avion

Den fin di siman a yega fo’i Newark y esaki tabatin cierto problema di cual nan mester a desvia. Pero despues di algun ora, e vuelo a continua y a yega den oranan di marduga. Na salida e turistanan a topa c’un situacion di no tin ningun taxi pafo.

Linda Orman, taxista, a splica e vuelo cu originalmente tabata bin fo’i Chicago tabata poni como delay y cada bes tabata hala e orario pa dos ora. Nan no tabata scucha nada, pero nan a bay busca informacion y a haya a cu el a baha na Kingston, Jamaica. Pero tanten cu motor dje avion no ta cendi, e flight radar no ta lesa nada. E taxistanan a keda check, pero nada. Incluso nan a puntra e trahadonan di Palm Tours y a tende cu nan tabata manda un otro avion, pero e avion no a lanta ainda.

Problema dje avion cu tabata rumbo pa Aruba, tabata cu el a perde un motor. E siguridad ta importante y ta tuma su medidanan. E ta dificil p’e compania busca un otro avion, pasobra na Merca ta conoci pa tin vuelo di conexion. Pa saca un avion y bay Jamaica p’asina sigui su destino ta tuma su tempo. Orman a indica cu e informacion tabata bisa ‘estimate’ y no ora di salida. Estimate ta algo cu ta cambia. El a bisa na su coleganan cu ta keda anochi pa check esey riba e website. E kiermen e no ta bay manda hende aeropuerto y warda.

Segun Orman, un colega a bay abou pa duna señal na e otro taxistanan cu e pasaheronan a cuminsa sali. Asina ey pocopoco e taxistanan a cuminsa yega, incluso tabatin taxista cu a bin pa un di dos biaha, pero ya tur cos a keda cla.