Apesar ku Kòrsou ta konfrontando su retonan finansiero ekonómiko ku ta influensia tur sobrá area di gobernashon, suskrito ta rekonosé e esfuersonan ku ta keda hasí pa logra mantené i amplia konosementu nan pa un mihó kalidat den kuido sea riba area korporal, medisina, medio ambiente, kaya, playa pa menshoná algun.

Pero di otro banda ta notabel ku limpiesa i mantenshon ainda no ta optimal riba nos isla. Esaki sigur ta krea un impreshon ku limpiesa i mantenshon ta ménos importante na es momentu aki. Klaramente esaki ta trese un sentimentu di iritashon pasobra ketu bai siudadanonan ta puntra ki dia nos mes ta siña tene Kòrsou limpi?

Si nos ta papia di hasi i propagandá Kòrsou komo entre otro un ‘Wellness Destination’ i ku turismo mester bira un pilar mas fuerte i mas amplio i determinante pa nos ekonomia e ora ei Kòrsou no por sigui sushi mas. Den e mes un rosea nos mester bolbe kòrda ku kada siudadano den nos komunidat tambe mester realisá i kontinuamente keda konsientisá ku ta nos tur ta kara di Kòrsou i ku kada unu di nos mester hasi su máksimo esfuerso pa tene nos isla limpi i bunita.

Lamentablemente suskrito ta konstatá ku kontinuidat pa basta aña kaba no ta keda reflehá riba diferente area ku e konsekuensia negativo ku diferente proyekto ta keda parsialmente realisá sin un bista konkreto pa terminashon. Aki suskrito ta referí na e parti no desaroyá na Marie Pampoen Bouelvard ku pa algun tempu ta para ketu.

Dikon Marie Pampoen Bouelvard?

⦁ Un area diariamente okupá pa siudadanonan sea pa hasi ehersisio, tene piknik, selebrá kumlpe años di famia of amigunan, tene deskanso pa kome of relahá, subi fli i aktividat deportivo kolektivo djis pa menshoná algun.

⦁ Un area kontinuamente trafiká pa lokalnan i turistanan sea na pia, bus, konvoi, tour-bus, taxi, baiskel i buggies.
⦁ E area di Mariepampoen Bouelvard ta un zona sigur turístiko teniendo na kuenta ku e diferente hotèlnan i tur sobrá aktividatnan turístiko den serkania.
⦁ Meskos ku siudadanonan tambe un turista por filma imágen asin’aki pa e por mustra su famia i amigunan den eksterior i kompartí su opinion ku konsekuensia di un posibel propaganda negativo pa imágen di Kòrsou.
⦁ Artistanan internashonal di renombre tambe ta bishitá Kòrsou i ta hospedá den serkania di e area aki.

Mirando ku tempu ta sigui pasa i e imágen ta keda bira ménos agradabel den su totalidat i miéntras ta warda riba fase 3 nos ta hasi uso di artikulo 96 di Reglamentu di Orden di Parlamento pa hasi minister e siguiente preguntanan.

⦁ Minister por rekonosé e alterashon den pueblo pa ku e estado di e area menshoná i impakto negativo ku e imágen aki ta trese?
⦁ Dikon mantenshon i limpiesa na e sitio aki no a haña e atenshon debido miéntras ta warda riba fase 3 mirando ku e area a krese i bira un area di rekreashon i turístiko pa basta aña kaba?
⦁ Minister tin un alternativa pa mantenshon i o limpiesa miéntras ta warda riba ehekushon o implementashon di fase 3?
⦁ Si no tin un alternativa a korto plaso, minister por mira komo un alternativa pa gobièrnu traha un asina yama Public Private Partnership (PPP) ku un of mas kompania priva pa atendé ku e limpiesa di e area ariba menshoná i eventual otro areanan ku mantenshon atrasá?
⦁ Minister ta kompartí e idea ku mester traha riba e mindset pa Kòrsou bira un Wellness Destination i ku mester di mas edukashon i informashon konstante pa komunidat por kere i karga esaki?
⦁ Minister por informá Parlamento si tin un plan di maneho pa esaki kaba den práktika?
⦁ Minister por indiká si SELIKOR por tin un ròl prominente den e totalidat di limpiesa i mantenshon riba un base mas kontinuo di e area aki?
⦁ Minister por indiká na Parlamento si ministerio di Salubridat Públiko, Medio Ambiente i Naturalesa ta trahando ku ministerio di Transporte, Telekomunikashon i Planifikashon Urbano pa atendé ku e problemátika di sushedat i mantenshon aki?

Marie Pampoen Bouelvard, un area parsialmente den desaroyo na kosta no por tin un parti kontinuamente manera un mondi pa motibu di falta di limpiesa i mantenshon. Aparte di ta un bista hopi mahos tambe ta asosial pa hende sinta mei mei di hopi shushedat di mata òf ta haña nan mes tin ku limpia un parti pa asina por kontinuá ku nan aktividat. Matanan i palunan ku ta krese inkontrola i ta tapa visibilidat ku ta stroba e bista di e area ku ta duna un sentido di inseguridat na e bishitantenan.
Pa duna minister un bista mas kla di e situashon aktual nos a agregá 3 potrèt pa ilustrá esaki.

Nos ta konta ku minister lo duna e inkietutnan previamente menshoná e atenshon rekerí pa asina trese e klaridat i e trankilidat nesesario pa ku e area aki.

Comments

comments