Den un publicacion riba Facebook, lider di MEP y prome minister Evelyn Wever-Croes, a mustra riba e hecho cu awe tardi, oposicion, den esaki, partido AVP, ta sali manifesta, aunke cu el a indica cu e motibo di e manifestacion ta incomprendibel y inhustifica.

Apesar di esaki, ta respeta e derecho di manifestacion di tur ciudadano di nos pais. E mandatario ta sigui bisa den e publicacion: “Ban duna nan espacio pa expresa nan mes, y no cay den provocacion. Tur minister di nos Gobierno lo compaña mi pa ricibi e manifesto, cu excepcion di colega Xiomara cu ta atendiendo reunion di IMF. Mi ta pidi tur hende pa keda calmo, actua responsabelmente, no provoca y no cay den provocacion. Mi ta pidi especialmente simpatisantenan di nos partido pa no acerca e area di manifestacion y duna espacio na oposicion pa nan manifestacion.

E Gobierno cu mi ta encabesa a hereda hopi reto di e mal maneho di gobierno anterior, pero nos ta riba e bon rumbo pa rescata nos pais. Nos pais awor mester di stabilidad y un manifestacion ni un eleccion awor, ta duna e stabilidad ey.

Nos ta ciudadanonan responsabel y cu amor grandi pa nos pais. Ban demostra esey awe tardi tambe.”

Comments

comments