Durante un conferencia di prensa na sede di e partido, lider, Evelyn Wever Croes, den un anuncio di dos minuut a informa cu: Campaña a cuminsa.
Oficialmente MEP ta cuminsa awe cu e campaña 2021, e lider a anuncia, bou aplauso di esnan presente. A habri campaña lansando un logo nobo. “Nos ta lansa campaña cu un logo nobo … un logo dinamico, moderno y cu ta mustra e determinacion,” asina Evelyn Wever Croes a bisa.
Luis Luna tabata encarga pa lansa e logo aki den un presentacion audio visual di 30 seconde.
E logo nobo ta mustra e simbolonan tradicional di e partido cu ta e parha y e solo, e colornan geel y cora pero den un concepto moderno. E fenix tin un efecto 3D, cu hobennan a indica di lo kier mira den e logo. E fenix ta sali pafo di e solo. “E ta simbolisa e forsa pa saca e pais for di cualkier crisis, specialmente den tempo dificil. Un fenix ta para pa forsa, renobacion, speransa y inmortalidad.”
E diseño di e logo tabata den man di un hoben, miembro di e hala hubenil HOT, esta Xavier Maduro, kende hunto cu un team a traha basta tempo pa modernisa e logo, manteniendo historia tras di esaki.
