Recientemente 24ora.com a publica un articulo, cu segun nos fuentenan den husticia, cu nan tin un asunto pa regla cu Edmond “Eddy” Paris, candidato #22 riba lista di MEP. Nos fuente ta sigura cu Paris kier evita di bin Aruba pa e no hay’e cu problema cu husiticia. Manera ta conoci, Paris ta atende asuntonan relaciona cu Union Europeo pa Aruba. Paris no a bin pa eleccion siendo e tabata riba lista di MEP, tur esaki probablemente p’e mesun motibonan indica.
Di otro banda, awe nochi durante un conferencia di prensa di gobierno, a puntra e lider di MEP y alabes formado di e proximo gobierno, si el a tuma nota di e publicacion. Wever-Croes a confirma cu el a lesa e articulo y cu mesora el a yama Eddy Paris awe mainta puntr’e si di berdad e ta scondiendo pa husticia di Aruba. Paris a confirma su lider cu e no tin problema cu husticia y cu e no ta scondiendo tampoco. El a confirma si, cu den pasado e tabata meti den dos caso pero el a gana ambos den Corte.
A puntra Wever-Croes riba e ausencia di Paris pa cu eleccion na Aruba, siendo e tabata riba lista como candidato #22. E lider di MEP alabes minister presidente demisionario y formado a reacciona bisando: “El a haci esey riba mi peticion.” Pues no ta asina cu Paris no a bin Aruba pasobra ta scondiendo pa husticia di Aruba, sino cu Evelyn Wever-Croes a bis’e cu e tin cu keda den friu na Hulanda pa atende Conseho di Minister di Reino.
Ta den e mesun dianan ey Aruba tabata pendiente pa e sosten di likidez di 181 miyon florin. Mirando cu Minister Plenipontenciario di Aruba tabata den pleno plakmento di sticker den Savaneta, e ora Aruba a keda sin ningun representante na Hulanda, pues Paris mester a campaña den friu via Skype. Su campaña via Skype y su ausencia na Aruba durante eleccion a cost’e un caida den voto tambe compara cu 2017. E candidato aki na aña 2017 a haya 140 voto cu un campaña pisa. Na 2021 el a bay cu mesun #22 riba lista y a haya solamente 28 voto sin cu e tabata na Aruba.
