Diahuebs ultimo comisario di relacion internacional di MEP, sr. Joe Koolman a sali pa Oaxaca, Mexico, unda e tabatin e honor y previlegio pa den nomber di partido asisti na e di 40 aniversario di fundacion di e organisacion prestigioso COPPPAL (Conferencia Permanente de Partidos Políticos de América Latina y el Caribe) y na cual conferencia a honra nos libertador y lider inmortal Betico Croes.
Hopi emocionante tabata na momento cu a devela e plakkaat cu nomber di tur esnan cu a firma e acta di fundacion di COPPPAL dia 12 di october 1979 y caminda e nomber di Betico Croes tambe ta aparece como co-fundador.
E distincion ‘Medalla al Merito Gustavo Carvajal Moreno, Mensahero de La Paz’ ta ser otorga na e personanan of institucionnan kendenan a destaca den difundi y promove den accionnan specifico e cultura di paz na nivel global y di manera particular den America Latina y Caribe, esta traha na defensa, promocion y proteccion di e derechonan humano di nos rumannan di America Latina y Caribe.
Tambe Presidente Alejandro Moreno di PRI (Partido Revolucionario Institucional) a duna un reconocemento special na nos Libertador Betico Croes.
Durante e conferencia aki Joe Koolman a topa cu algun gran amigo di Betico, entre otro ex presidente di Bolivia y co-fundador di COPPPAL, Jaime Paz Zamora y tambe cu Ruben Berrios di Puerto Rico. Tabata un momento hopi special ora cu Koolman a topa cu sra. Sofia Carvajal cu ta yiu muhe di Gustavo Carvajal. Otro encuentronan tabata cu diputado Williams Davila di AD di Venezuela, Gobernador di ciudad Oaxaca, Alejandro Murat Hinojosa, Presidente di PRI, Alejandro Moreno y ex presidente di Panama, Martin Torrijos.
Na mes momento un felicitacion y gradicimento special ta bay na Rudy Croes pa su sublime representacion den COPPPAL, unda cu el a cumpli e aña aki 30 aña formando parti di e organisacion aki, di cual 12 aña como Vice presidente y encarga cu casonan colonial pa COPPPAL. Sin duda cu Betico Croes a haya su reconocementonan bon mereci na e conferencia di COPPPAL na Mexico y ta muestra cu su spirito di lucha y perseverancia ainda ta biba den e paisnan amigo cu semper a duna sosten y a para banda di dje den su lucha pa realisa e libertad di nos pueblo.
