Siman pasa e Parlamentarionan nobo a huramenta dilanti Gobernador. Esaki ta despues cu esun anterior, a tuma nan retiro y a huramenta como Minister diabierna ultimo. Pero kico lo a pasa si e ley adapta di “kiesverordening”, cu nan tabata trahando riba dje caba, a pasa? E constelacion sigur lo tabata diferente!
Mester remarca cu partido POR, aunke cu no tabatin e ley, a firma un protocol entre su 29 candidatonan caminda cu nan ta para pa esun cu tin mas voto, eseynan lo drenta Parlamento. Den e caso aki, despues cu Otmar Oduber y Andin Bikker a tuma nan retiro como Parlamentario pa bira Minister, esunnan cu a sigui lo tabata Marisol Lopez-Tromp y Joselin Croes. Pero den e caso di Joselin Croes, mirando cu Alan Howell a ricibi mas voto cun’e, el a sede su asiento y a pase pa Howell, kende a bira Parlamentario na su luga.
Den e caso di MEP ta diferente. Nan a aplica e ley existente, cu ta segun orden di aparicion riba lista. E Parlamentarionan cu a bin acerca den e caso aki, segun numeracion ta Edgard Vrolijk, Endy Croes, Shailiny Tromp-Lee, Ady Thijsen (Presidente di Parlamento), Setty Christiaans-Yarzagaray y SueAnn Ras. Ya Hendrik Tevreden, Rocco Tjon y Daphne Lejuez a huramenta como Parlamentario desde dia 27 di October.
Pero si e ley di kiesverordening a bin na vigor prome cu e huramentacion, e constelacion Parlamentario lo ta asina aki: Rocco Tjon, Arthur Vallejo, Endy Croes, Hendrik Tevreden, Edgard Vrolijk, Shailiny Tromp-Lee, Darlaine Guedez-Erasmus, Ady Thijsen y Karel Maduro.
Aunke cu a elabora hopi riba e cambio di ley prome cu eleccion y a purba pa Parlamento a pasa e ley prome cu eleccion, toch e no a sosode.
Promotor di e ley aki, Dangui Oduber a sigura cu lo haci tur posibel pa e ley pasa pronto y asina aplica e forma nobo aki den e siguiente eleccion. Oduber mes no por presenta e iniciativa di ley aki mas awor cu e ta Minister, sino mester sali di Parlamentarionan nobo den e Fraccion di MEP.
E cambio di ley tin pro y contra, pa cual un grupo den tanto MEP como AVP no ta na fabor, pasobra e lo kita hopi poder di e lider di partido. Ta obvio cu e lidernan ta pronostica locual cada candidato lo por haya na voto y asina ta duna nan number. Por nota cu den esey a postula Daphne Lejuez mucho halto riba lista, mescos cu Mike Eman a postula candidatonan manera Richard Visser y Michael Lampe mucho halto en bes di candidatonan manera Gerlien Croes.
