Diasabra awo, prome cu Santo Misa ta resa Santo Rosario, pa 6:15am, “Misterio Gososo” y sigui pa Salve Regina.
Ta invita e pueblo di Aruba, devoto y fielnan pa asisti na e lesamento di Santo Rosario prome cu Santo Sacrificio di Misa. Cu Mama Maria entercede pa nos na nos Tata Celestial. Papa Francisco ta haci un suplica na mundo pa resa e Santo Rosario, nos ta den un tempo di crisis grandi.
E noticianan for di Ucraina ta di lamenta, espantoso pa mundo henter. Hesus tene piedad pa henter mundo. Ban haci un curashi diasabra mainta trempan pa ofrece nos ora, nos oracion y asisti na Santa Misa y resa pa tur esnan cu ta leu di nan Creador.
Laga nos resa pa necesidad di Iglesia Universal, pa Papa Francisco, Obispo Luis Secco, tur sacerdote-, diacono- y laiconan cu ta hiba e bon noticia pa e pueblo di Dios. Pa nos gobernantenan y tur cu ta carga responsabilidad pa nos pais Aruba.
Dia 16 di Juli ta celebra Nuestra Señora del Carmen, cu ta patrona di Orden di Souernan Carmelita. Nan convento cu ta keda den e seronan di Carmel ta yama Strea di Lama. Ban resa pa tur nos enfermonan den exterior cu a bay busca nan salud, cu pronto nan regresa na Aruba y gosa di un bon salud den e comunidad.
Cu Dios manda awasero saludabel pa nos suela seco, mata y palonan di mondi cu nan reisnan ta sclama pa awa bendiciona.
