Marihuana medicinal por yuda cu varios condicion di salud, pero siguramente e no ta un cura pa cancer. Awo, Food and Drug Administration (FDA) di Merca, ta bahando riba varios compania cu ta indica cu nan productonan di cannabis por deshaci di cancer, esaki ta segun varios medio online, entre otro NBC y tambe Lifescience.
FDA a manda cartanan di advertencia na cuater compania cu ta bende productonan cu ta contene cannabidiol (CBD) y ta indica cu e ingrediente por trata of cura cancer, di acuerdo cu un relato saca pa FDA diamars ultimo, dia 1 di November. CBD ta un componente haya den marihuana, pero contrario na un otro componente den e mata yama tetrahydrocannabinol (THC), CBD no ta causa efectonan psicoactivo.
CBD ta wordo bendi den productonan manera gota, thee, capsula, stropi y locion, FDA ta bisa.
E cuater companianan – Green Roads Health, Natural Alchemist, That’s Natural! Marketing & Consulting y Stanley Brothers Social Enterprises LLC – a bende en total, mas di 25 diferente tipo di producto cu ta indicacionnan medico insubstancia, di acuerdo na FDA.
Aki tin algun indicacion haci pa e companianan: E producto “ta combati tumor y cellnan di cancer.” “CBD ta haci cu e cellnan di cancer ta comete “suicidio” sin mata otro cellnan.” “CBD (tin) propiedadnan anti-proliferativo cu ta inhibi e divisionnan y crecemento di cell den cierto tiponan di cancer, no permitiendo e tumor pa sigui crece.” y “Cannabinoidenan no-psicoactivo manera (CBD) (cannabidiol) por ta efectivo den tratamento di tumornan di cancer – incluyendo cancer na pecho.”
FDA a bisa den e declaracionnan cu e productonan aki no a wordo proba di ta safe of efectivo y cu ta haci claimnan insubstancia, ta un violacion di e ordenansa di FDA.
“Substancianan cu ta contene componentenan di marihuana, lo wordo trata manera cualkier otro producto cu tin indicacionnan no proba pa reduci tumornan di cancer,” Comisionado di FDA, dr. Scott Gottlieb a bisa den un declaracion.
FDA no ta permiti companianan pa mercadea productonan ‘cu indicacionnan sin base,’ Gottlieb a bisa.
“Tin un cantidad creciente di terapianan efectivo pa hopi cancer,” el a agrega. “Ora cu hende ta permiti pa mercadea productonan ilegal cu ta entrega beneficionan no estableci, por desvia pashentnan for di productonan cu a proba di tin efectonan anti-tumor cu por extende bida.”

Comments

comments