Le Groove a acepta invitacion pa toca den Arubadag 2020

Pa hopi aña Arubahuis ta organisa e evento di Arubadag cu hopi amor y dedicacion. Tur aña nos ta traha tambe pa mehora y renoba e concepto.

Despues di a anuncia e lineup di e aña aki e comision organisado a ripara cu esaki no a cay na boso agrado, y no tabata locual a spera. Arubahuis ta organisado berdad di Arubadag pero e celebracion aki ta di comunidad. Ta consciente cu ta dificil pa complace tur hende y tur gusto, y tur aña tin un of mas critica riba partinan di e evento, na cual critica sigur nos ta trata di duna oido y tene na cuenta pa e proximo edicion. E ta obvio si cu e aña aki ta den preparacion y den e lineup, no a scucha bon kico ta e deseo di comunidad.

Mirando e situacion financiero precario di pais Aruba e no tabata posibel pa invita e banda Le Groove completo. Mescos cu rey di Caiso y Rey di Tumba di Aruba su carnaval, a opta pa invita e rey di Soca, Antoni Gario, como individual pa presenta na Hulanda. E comision por informa cu e partnernan di Arubadag a crea un espacio financiero y a ofrece pa cubri e gastonan pa trece Le Groove Hulanda pa Arubadag. Mientrastanto ya caba e invitacion a sali pa Le Groove pa t’ey presente na Arubadag Festival 2020 y cu nan a acepta e invitacion brinda.

Ta den espera di e confirmacion oficial di e rey di Caiso Galloway Jr. Mientrastanto a ricibi e confirmacion oficial y por comparti cu nos Rey di Tumba Jerino “Bass” Riddertsap a confirma su participacion na ArubadagFestival 2020.

E team ta revisando tur e informacion y sugerencia cu ta ricibiendo, ta analisando na mes momento kico ta e cambionan y mehoracion cu por realisticamente aplica den transcurso di fin di siman y presenta esaki na boso riba dialuna proximo. E comunicado di Aruba Huis a finalisa ta gradici un y tur pa e comentarionan y ta invita tur Arubiano na Hulanda pa yega Ahoy dia 29 di Maart proximo pa hunto nos celebra ArubadagFestival 2020.