Un di dos candela grandi a tuma luga na Philipsburg, St. Maarten riba diamars, e biaha aki riba e landfill original, resultando cu autoridad ta purbando pa contene esaki, mientras cu nan ta purbando pa contene e candela original cu a cuminsa diadomingo riba e di dos landfill, crea despues di horcan Irma, segun The Daily Herald.
Explosionnan por a wordo scucha ta bin for di e candela nobo, cu rapidamente a converti den un fierno masivo y a plama rapidamente riba e landfill, resultado den miedo cu esaki por bay over den seccionnan di e comunidad.
Prome Minister Leona Romeo-Marlin, a indica den un update laat diamars anochi cu e edificio di administracion di gobierno lo keda cera pa publico awe, diaranson. Seis scol den e area di Philipsburg – Charlotte Brookson Academy (CBA), Oranje School, Ciclo 1 y 2 di Genevieve de Weever School, Sister Borgia School, St. Joseph Primary School y Sundial School – como tambe e universidad di St. Maarten (UM), e Instituto Nacional pa Avancenan Profesional (NIPA), como tambe e campus di Hillside Christian Schools Asha Stevens na Cay Hill a pidi pa keda cera awe. Tur e centronan di cuido den e areanan di Philipsburg y Cay Hill tambe lo keda cera.
Actividadnan recreacional tumando luga na e LB Scott Sports Auditorium riba Walter Nisbeth Road (Pondfill) lo mester wordo cancela of posponi te otro aviso, asina e prome mandatario a indica.
Tres barco crucero cu ta programa pa ta den waf awe, mester a evalua e situacion y a wordo pidi pa uza nan discrecion, sea pa ancra na e puerto di St. Maarten, un comunicado a bisa. The Daily Herald tin di compronde cu e barconan de facto a wordo desvia.
Ministerio di Salud Publico, Desaroyo Social y Labor VSA, ta den contacto cu e St. Maarten Medical Center (SMMC) y nan no a experencia un aumento den pashent cu problemanan respiratorio, e comunicado a bisa.
Romeo-Marlin a bisa cu e di dos candela aki ta wordo atenci pa e departamento di bombero, e Ministerio di vivienda Publico, medio Ambiente, Desaroyo di espacio y Infrastructura VROMI y contratista general di e landfill. “Tur recurso disponibel ta wordo uza pa combati e candela,” el a bisa.
E Conseho di Minister a disculpa na e comunidad di Philipsburg y e areanan den vecindario, como tambe na e otro districtonan afecta pa e huma for di e candelanan riba e landfill.
Romeo-Marlin ta gradici na e first respondernan, trahadonan civil y tur hende “cu a sigui traha y contribui na e pagamento di e dos candelanan grandi aki riba e landfill.”
El a bisa cu un investigacion ta wordo conduci pa autoridadnan relevante pa haya sa kico por a causa ambos candela. “Un di dos candela rib e landfill di Pond Island ta di gran preocupacion pa e gobierno y tin su atencion completo,” el a bisa.
