Landadonan preparando pa nan “Long Distance Open Water training” diasabra awo

Davy Bisslik, Deaxo Croes, Stephan Thijsen y Wendy Kock lo tin un otro ‘long distance open water training’ diasabra 28 di juli 2018, den preparacion pa e hazañanan cu ta na caminda, cualnan ta landa di Venezuela pa Aruba y tambe landa rond di Aruba.

Dia 7 di augustus 2018 ta net 30 aña pasa cu Roly Bisslik a landa di Venezuela pa Aruba den 10 ora 28 minuut pa realisa su soño y tambe recauda fondo pa cumpra e tereno pa contrui un pisina di 50 meter. E distancia cu lo landa e biaha aki ta calcula di ta alrededor di 32 KM. E landadornan lo baha awa na e punta mas p’ariba di Aruba cu ta yama Labadera manera cu e prome rayonan di solo sali. Ta calcula cu esey lo ta banda di 6.00 am. Lo landa banda zuid di Aruba te na altura di Manglo Halto.

Aki ta drenta lagun y lo sigui den direccion west te na Surfside. Aki lo drenta den e area di waf y sigui bai west. E final lo ta na Aruba Marriott Resort & Stellaris Casino y ta calcula cu e prome landador lo yega banda di 1.30 PM. Cada landador lo wordo acompaña pa su propio boto riba cual e tin su propio coach/ayudante y tambe cada boto lo tin un persona cu ta lastra na cabuya patras di e boto cu ta vigila y observa pa posibel peliger. Cada landador lo tene su mes tambe na un schedule estricto di alimentacion y hydratacion cu ta necesario ora di tipo di entrenamento asina. Landamento den lama no ta igual na landa den pisina. Mester tene cuenta cu factornan manera biento, altura di olanan, temperatura di awa y aire, visibilidad den awa y coriente. Tur esaki ta bow guia di e legendario coach y landador Roly Bisslik kende 30 aña pasa a landa di Venezuela pa Aruba.

Ta pidi pa tur boto riba lama pa tira bista pa e landadornan aki y pa keda banda zuid pa asina e huma di motor no afecta nan. Durante e training lo informa publico cada ora via Facebook riba e schedule, progreso y yegada di e landadornan na Aruba Marriott.