Ladronnan na Playa Linda Mini Market ta conoci den e area

E señora deteni den e caso di ladronicia di alcohol den Playa Linda Mini Market ta resulta di ta masha conoci den e area, pa hunto cu e mucha muhe hoben, cu tambe ta deteni pa e mesun delito. Hunto cu un mucha homber mas, nan tres a bira conoci caba pa ta horta den area di hotelnan. Solamente cu e biaha aki nan a topa cu un cuerpo di siguridad na Playa Linda Beach Hotel cu a pone nan para stret, a yama Polis y a percura pa detencion di tur tres, sospecha di atraco, asalto, ladronicia y hortamento bou menasa.

E grupo aki tin un forma di drenta tiendanan pareu, haci desordo y ta bruha e bendedonan pa asina logra horta mas facil. Ora nan sinti cu a gara nan, mesora nan ta bira agresivo, ta pone posicion pa bringa of ta purba dal e bendedo pa por sali na careda cu locual nan a bay cune. Locual nan no a conta cune e biaha aki ta, miembronan di siguridad decidido pa defende nan propiedad. Consecuentemente a detene tur tres y a bay duna cuenta na autoridad.

https://www.facebook.com/24ora/videos/2631413187158013/

Informacion for di seno policial ta indica cu e e señora tabata deteni caba pa e mesun tipo di sospecho. Ta parce cu esaki a bira nan “modus operandi”, di cual e mucha muhe y e amigo ta hunga un rol importante den e forma con nan ta maneha nan “negoshi di ladronicia”. Polis ta investigando e caso aki pa mira con por hinca e famia aki bek den e rumbo corecto di bida, sin cu mester horta of haci actonan criminal pa por sobrebibi.

Polis a topa cu e trio sospechoso aki cu boter di Buchanan’s y Hennessy, sin cu nan por a demostra un recibo di prueba unda nan a cumpr’e y paga p’e.