Dialuna mainta trahadornan di Digicel na Tanki Leendert a yega trabou y haya e pacus kibra y tur reboltea. Mesora a bati alarma na Polis y patruya di Playa a bay na e sitio. Na yegada a topa cu e trahadornan cu a conta riba e kiebro. Polis mes a bay mira. Via dal e ladron cu a drenta a corta e zink. A bin prepara pa baha y dor di kibra e plafond. E ladron tabata sa precies unda pa baha. Cu pata di cabra el a logra kibra cierto partinan. A yega caminda e placa di benta tabata warda den e negoshi. Den un caha di placa e ladron a logra coy mas cu 30 mil florin cash. Despues di eynan a bay pa e celularnan. Caminda nan ta warda a logra drenta y asina coy masha hopi Samsung S8. Esun ultimo modelo. Cu otro palabra ta un shop pisa e ladron aki a haci pa asina logra suma cuantioso cash y miles di florin tambe na cellular. Recherche y cuerpo tecnico a wordo avisa. Un investigacion profundo a cuminsa tambe. Claramente e prome indicacion ta cu e ladron sa bon bon kiko tabata tin den e pacus. Ademas un hende cu ta traha eyden so por a dune e informacion pa asina bay pa e placa y sera un aña carga cu placa cu no ta di dje. Straño cu por sona pero e alarma parce lo no a traha. Of el a traha y esnan cu ta responsabel no a descubri nada marduga. Autoridad tin atencion pa e caso serio.
