Ladron Babalu ta sigui terorisa Madiki

E conocido di husticia Babalu atrobe ta deteni. El a horta den un cas den Yolastraat. A haci denuncia. Djey doño mes a cuminsa move pa busca loke el a perde. A mira con Babalu tabata bay direccion Rancho pa cambia e cosnan horta pa droga of bende nan pa kico cu ta.

A yama polis. Polis no a topa Babalu den Rancho. Djey e persona cu ta victima di ladronicia a topa Babalu den Weststraat. Ey si polis a topa cu ne. A bay atende y hay’e cu cos horta. A deten’e y hib’e warda.

Pa cuanto tempo e lo keda cera no ta conoci. Esaki ta e ladronnan cu ta terorisa henter un area grandi y cay cera dos dia y ta liber atrobe. Victima ta perde su cosnan y ora kere cu tin husticia, e ta ekiboca.