Ladron a drenta horta den cas na Nieuwstraat

Diadomingo despues di 2:30pm, mientras cu atencion di tur hende ta pendiente di e parada di carnaval di mucha den cayanan di Oranjestad, a informa Polis di un caso di ladronicia den cas. Un ladron activo a drenta horta den un cas situa den Nieuwstraat. Ora e doño di cas a yega su cas, el a ripara cu e porta di cura ta habri y despues tambe cu e bentana di cas band’i p’ariba ta kibra.

E doño di cas a yama Polis, cu a tuma tur dato y a pidi pa e departamento Forensico di Polis pa pasa controla pa vingerprint y otro pruebanan cu e ladron(nan) por a laga atras na e cas.

A laga e cas tur reboltia y a coba den delaster un cashi den cambernan, den sala y hasta den cushina. E doño di cas ta sinti falta di un holoshi di oro y a keda di tira bista si a perde mas pertenencia, como cu e cas tabata tur bruha y cu e ladron a laga paña y tur cos benta abou den henter e cas.

Polis a tuma keho di e doño di cas y lo pas’e pa e departamento di Recherche pa mas investigacion. Cualkier persona cu por a mira un movecion diadomingo merdia den Nieuwstraat, lo por duna un man cu poco informacion, cu sigur por yuda Recherche pa gara e ladron envolvi.