Cu gol di Shadira Croes e ekipo di La Fama Damas ta logra un triunfo di 1-0 riba e amariyonan di Dakota cu cual victoria e ekipo di Savaneta ta logra sigura su clasificacion pa e serie semin final di e campeonato di AVB 2018-2019.
E resultado aki ta sigura tambe cu La Fama ta sigura e di tres puesto riba e tabla di clasificacion y awor ta keda Riverplate y Dakota pa lucha pa e cuater puesto pa asina completa e ekiponan cu lo bay den e siguiente buelta di play off.
E ekiponan di Britannia y RCA ya caba a sigura nan na clasificacion den e serie ta bay sigui.
La Fama sin duda ta logrando un resultado sumamente sorpresivo sigura ora cu tuma nota cu e ekipo tin un elenco nobo di hungadonan caminda en total shete hungado cu tabata estelar cu e ekipo ultimo dos temporada, sea a bay pa otro ekipo of no ta activo actualmente.
Den e wega contra di Dakota e ekipo di La Fama a subi tereno cu Hadassah Kock den gol, den defensa a hunga cu Avril Maldonado, Francien de Windt, Nicole Garcia y Jill Bislip.
Den medio campo a hunga Edriana Molina, Charmaine Boekhoudt, Jeyceline Werleman y Shadira Croes y e liña di atake a wordo forma pa Yenhifer Huntington y Lorraine Oduber.
Den di dos mita e ekiupo di La Fama a efectua varios cambio manera Aljesha Sweetnam a drnta pa Jill Bislip, Stacey Lampe a drenta pa Charmaine Boekhoudt, Roshyna Werleman a drenta na luga di Jeyceline Werleman y Nilita Alexander a drenta na luga di Lorraine Oduber.
Den e prome tempo e wega a tuma luga mas tanto den medio campo c’un dominio di parti di La Fama pero falta di efectividad den nan pasenan, a pone cu e ekipo a wordo limita na algun tiro di distancia cu portero di Dakota, Lyciene Loefstok no tabatin problema cu esakinan.
Dakota den e periodo aki tabata peligroso pa medio di e delantero Sally Slaine y kende a test capacidad di portero Hadassah di La Fama cu tironan liber pero oportunidad di gol mes, ningun di dos ekipo a logra den e prome tempo cu a bay aden den empate di 0-0.
Den di dos tempo e situacion a cambio y La Fama a pasa pa domina e accionnan y a lansa varios atake peligroso y a crea varios oportunidad di gol pero tanto Shadira Croes como Yenhifer Huntington no por a supera portero Lyciene ora cu nan tabata nan so su dilanti.
Dakota den e periodo aki no a haci mucho den e parti ofensivo pero a bira peligroso c’un tiro liber cu portero Hadassah Kock a logra saca den forma espectacular pa mantene e empate.
E gol di triunfo a bin cay na di 82 minuut ora cu riba un ataka for di banda drechi Nikita Alexander ta pusha e bala net bon pa Shadira Croes kende ta logra fusila portero Loefstok pa duna cu ekipo e triunfo di 1-0 y asina totalisa un total di 25 punto cu ta sigura e di tres puesto riba e tabla di posicion.
La Fama lo mira accion bek dialuna venidero ora cu nan topa cu Britannia na Centro Deportivo Frans Figaroa mientras cu Dakota su siguiente compromiso lo ta diamars contra di Deportivo Nacional tambe na Compleho Frans Figaroa.
