Diasabra, 16 di november, for di 9’or di mainta pa 12’or di merdia, a tuma luga un charla den Alhambra Ballroom, organisa pa Koningin Wilhelmina Fonds (KWF), hunto cu Fundacion Prostaat riba e tema di cancer na pecho y di prostaat, caminda cu tabata tin varios orador invita.
Jurgen Benschop, vocero di Fundacion Prostaat, a comenta cu tabata tin un sala basta yen di hende cu a bin busca informacion. E informacion suministra tabata basta interesante, cu ta mustra tambe cu cifra por mira hopi claramente durante ultimo añanan, con cancer ta haci su efecto den comunidad di Aruba.
Durante ultimo 10 pa 15 añanan, e cantidad di cancer nobo detecta a redobla. Esey ta indicacion fuerte cu hende ta birando mas consciente, nan ta haciendo mas nan testnan, sea fundaicon BOB of un dokter di cas y cu e dokternan tambe ta birando mas consciente cu tin mas tratamento y por ta mester di mas dokter pa Aruba.
Esey semper ta un preocupacion, pasobra mas caso di cancer bin dilanti, mas presion e ta pone riba e dokternan tambe pa por yuda tur e pashentnan, pa asina duna nan un calidad di cuido. Esey ta hopi importante pa nos comunidad y pa nan keda trankil tambe cu Aruba su calidad di tratamento ta hopi halto y cu nan por haya tur e tratamentonan aki mes sin bay afo.
E mainta tabata uno hopi positivo. E feedback cu a haya tabata hopi bon y tin cu sigui haci mas charla asina durante aña pa duna e comunidad chens di haci pregunta.
Pa loke ta trata cancer di prostaat, como fundacion, un di e enfokenan cu nan tin pa otro aña ta pa bin cu campaña pa haci testnan mas accesibel pa hende homber. Hopi biaha ta enfoca riba e hende muhenan. Manera fundacion BOB tin un campaña ta manda yama e damanan despues di 45 aña, cada dos aña por bin haci nan test di pecho, pero no tin nada similar na hende homber. E hende homber, mayoria biaha te ora nan sinti algo nan ta bay nan dokter y esey den practica ta mustra cu ora bo sinti algo, hopi biaha bo ta laat caba.
Un meta di e fundacion ta pa haci early detection, pa haci e hende homber consciente cu bo por haci un PSA test via sanger. Si tin indicacion cu e sali halto, e ora ta sigui cana e camindanan di bay dokter di cas y despues pa bay pa un urologo pa haci testnan mas avansa. Esey ta e meta di e fundacion. Poco poco nan ta logrando, Benschop a splica.
Di parti di Koningin Wilhelminafonds, secretaria di directiva Ivy Hernandes-Swaen, a splica cu como fundacion, sa haci charla frecuentemente, asina informa e pueblo tocante e riesgonan di cancer y e riesgonan cu bo por haya cancer pa asina bo por reduci esakinan. Tambe loke a tende hopi durante di e charla aki, con bo mes por haci bo mesun control y asina cu bo por detecta e cancer mas lihe y si tin algo no ta bon, mas lihe y por haya un tratamento mas lihe asina, pa asina por tin un cura pa e cancer tambe.
Kico nos falta
E problema grandi na Aruba ta obesidad. E ta un riesgo halto pa cancer na Aruba. Locual cu por haci, por tene cuenta con nos ta come, con nos ta move. Come mas saludabel, wak pa bo no haya aumento di peso, tene bo peso den control. Esey ta un factor hopi grandi caba cu ta yuda na reduci e cancer aki na Aruba.
Esnan mas vulnerabel
Personanan mas vulnerabel, ta bin di tur edad. Tur hende di tur edad por haya cancer. Por a mira durante e charla aki cu e edadnan mas vulnerabel pa cancer di pecho cu ta entre 45 y 75 aña. Pero esey no ta kita cu den e edadnan mas jong bo no ta haya cancer. E ta keda un factor cu abo mes mester controla. Abo mester conoce bo curpa y abo mester sa con e ora bo ta detecta tambe cu tin algo cu no ta cuadra cu bo curpa, cu bo por bay bo dokter y check mas aleu si e por ta algo malo of por ta e no ta nada di preocupa. Bo mes e ora ta na tempo y bo mes por detecta na tempo. Si ta algo malo, bo por haya tratamento mas tempran posibel. Cancer bo por mira den tur edad. For di mucha pa hende grandi.
