KVK: Pa sobrevivi, comercio mester opera cu menos trahado y menos salario

2313

Comercio local ta bou presion enorme, tin cu por wanta esaki un poco pero no ta tur. P’esey ta importante pa tin un sistema flexibel cu por yuda nan sigui cu e operacion. Satish Daryanani, presidente di Camara di Comercio (KvK) a splica cu cada empresa ta dicidi riba nan mes con hopi nan por sobrevivi.

Tin compania caba cu a yega na e conclusion cu nan no por sigui y a cera nan portanan. Tin cu ta den situacion dificil, pero lo trata pa wanta debi cu nan tin nan famia estableci aki y no ta bay entrega asina facil. Pa casonan asina ta importante cu tin e espacio necesario (flexibilisacion) pa por sigui cu operacion. Kisas lo mester manda algun hende cas, pa e por sigui draai den e temporada crucial. Segun economia cuminsa crece, e compania tambe lo dal su stapnan padilanti. 

E no ta un situacion facil. “Nos ta compronde cu mester protege e cuponan di trabou, pa cual ta hopi importante consulta entre stakeholdernan pa mira kico ta miho bou di e circunstancianan actual. Den KVK ta existi e pensamento cu mester evita mas tanto posibel cu companianan ta bati bancarota den un periodo cortico cu lo tin como consecuencia cu hopi mas hende ta bay perde nan trabou,” Martijn Balkestijn (Director di KVK) a bisa. Pa e motibo aki nan ta encurasha Gobierno pa durante un periodo cortico, flexibilisa e leynan laboral. Esaki ta di tal forma cu ta permiti e comerciante no solamente papia di layoff pero baha e orario of cantidad di dianan di trabou. Bancarota di un compania ta nifica cu ta tur hende trahando eynan ta perde nan trabou. 

Pa sobrevivi, comercio mester opera cu menos trahado y salario diferente

Pa sobrevivi, comercio mester opera cu menos trahado y salario diferenteClick link pa mas: https://24ora.news/30V6dnF

Posted by 24ora on Friday, August 14, 2020

E intencion ta pa e companianan por sigui funciona, pero cu menos gasto, den e proximo lunanan. Y despues ranca bay mas lihe na momento cu economia cuminsa draai bek. Na e punto ey por cuminsa tuma hende bek na trabou. E flexibilisacion di leynan laboral ta bay cu un maneho unda mester evita cu e hendenan ta bay cay den un situacion di problemanan social. KVK tin nan consehonan cla pa Gobierno pa evita e situacion aki. 

Si mira bon, segun Omar Tromp (Vice Presidente di KVK), tur hende por mira cu GDP y fluho di comercio a baha. P’esey mester adapta na e realidad nobo aki, sperando cu turismo lanta cabes den e proximo añanan. E realidad nobo aki ta nifica un operacion cu menos empleado y salarionan cu tabatin prome cu e crisis no ta factibel mas. E tambe ta kere den flexibilisacion di leynan laboral, pasobra e companianan no tin e placa awo tampoco pa laga nan bay. E leynan laboral “awe no ta duna e negoshinan chens pa sigui cu menos gasto”.