KVK: Gobierno mester corta salario di ambtenaarnan y pas’e pa sector priva

Camara di Comercio y Industria Aruba (KvK) ta convenci cu nos isla ta den uncrisis social y economico pisa. E organisacion a tuma nota tambe di e medidanan cu Gobierno a anuncia recientemente pero ta convenci cu tin espacio pa ampliacion of mehoracion di e medidanan aki, den cuadro di por logra miho resultado. Ta Camara di Comercio ta importante pa na final nos economia sali bon di e crisis aki, den cual Gobierno, Sector Priva y e trahadonan por sigui padilanti.

Ta duna oido na sector priva cu a expresa nan preocupacion cu e situacion di crisis a consecuencia di COVID-19 (Coronavirus). Hopi negoshi a tuma e medidanan di Gobierno na serio y a indica nan preocupacion pa por mantene nan negoshi riba awa. E medidanan aki tambe ta afecta e empleadonan di negoshinan mediano y chikito. E comerciantenan a trece dilanti cu nan ta hopi preocupa cu futuro di nan empleadonan!

Pa cu e situacion di crisis actual, KvK ta trece dilanti algun sugerencia pa e sobrevivencia di negoshinan y tambe e problema di empleo cu por surgi:

1. Comerciantenan mester haci tur loke ta posibel pa mantene nan empleadonan riba payroll;
2. Gobierno mester apoya comercio den esaki;
3. Gobierno mester corta nan propio salarionan y duna e placa bek na comerciantenan pa paga nan empleadonan di sector priva cu e placa aki;
4. Servicio di Elmar/WEB/ /Setar/ mester ta disponibel liber di gasto, no posponi, gratis, te proximo aviso;
5. Tur impuesto cu mester paga no mester keda posponi, sino exonera inmediatamente, asina cu comerciantenan por paga e empleadonan riba nan payroll (y tene e fluho di cash moviendo), te proximo aviso;
6. Gobierno mester traha duro pa haya un inyeccion di capital pa e suma cu Aruba mester pa tene economia na bida por lo menos te fin di aña, calcula a base di luna pa luna;
7. E inyeccion menciona na punto 6 mester bay pa comercio pa nan por paga nan empleadonan y no pa cubri e gasto di payroll di Gobierno.

Camara di Comercio ta na altura y ta sinti cu Gobierno ta haciendo tur cos den nan poder pa por yuda alivia e situacion, pero a compronde di e miembronan registra na KvK cu e puntonan menciona ta nan preocupacion di mas grandi. Lo por tin alrededor di 50.000 hende sin trabou, poni riba caya na Aruba cu lo mester ayudo. E personanan aki, cu ta forma parti di nos comunidad, lo bay tin mester di ayudo urgente!

Camara di Comercio y Industria Aruba (KvK) ta termina bisando cu nan ta dispuesto pa brinda ayudo den tur forma y unda cu ta necesario.