E reunion aki mester a sosode desde aña pasa caba pa por a presenta e cambionan di Reforma Fiscal dia 1 di januari 2019. Gobierno no a logra y a keda di introduci e medidanan aki dia 1 di juli 2019 y esey tampoco no a logra. Pa Camara di Comercio (KVK), ta imposibel cu awor despues di 9 luna di e aña aki, cu ainda Gobierno no tin un documento fiho di kico e ta bay haci, sino a bin cu opcionnan awe y cu recomendacionnan di IMF. A warda 9 luna pa awe haya “nada” pa mira, segun e organisacion di comerciantenan.
E Presidente di Camara di Comercio, Kawish Misier no tabata contento pa e forma con Gobierno a organisa e sesion cu gremionan comercial. Nan tabatin problema cu no a invita tur gremio, cu e evento a cuminsa hopi laat mes, cu a cambia agenda e ora ey ainda y a papia un idioma bruha riba kico ta e futuro fiscal di nos pais. En bez cu Gobierno a presenta kico tur e expertonan Fiscal a prepara tur e lunanan, awe a presenta simplemente loke organisacionnan internacional a conseha nan. Esey defintiviamente no ta locual comerciantenan a spera di mira.
Riba dje, a duna comercio solamente 10 minuut pa haci pregunta na Gobierno. Pues nan a haya 9 luna pa presenta e plan aki y comercio tin 10 minuut pa evalua y opina riba e maneho cu probablemente lo keda pa e siguiente 20 pa 30 añanan. Camara di Comercio no ta haya e maneho ey husto y ni transparente. Ta sinti cu Gobierno kier “bulldoze” e cambio di ley aki sin duna comercio participacion real den e decision.
Mayan tin un otro sesion atrobe cu “stakeholders” den cual ta spera di por tende mas di Gobierno riba e asuntonan aki. Awe a scucha solamente riba “Sugar Tax” y nada ainda di e cambio di BBO pa bay waf y tampoco di un otro belasting nobo cu lo introduci specialmente pa hotelnan. Comercio ta sinti falta di e oportunidad real pa por expresa nan mes y duna Gobierno mas opcion y ideanan nobo con pa haya mas placa den caha, sin cu mester cobra pueblo.
