Diahuebs 19 di september Camara di Comercio y Industria di Aruba (KvK) a tene un reunion informativo den colaboracion cu representantenan di e cuidad di Risaralda, Colombia. E motibo di e reunion ta pa haya informacion encuanto e mision comercial di diferente empresa di e cuidad di Risaralda.
Nan ta di bishita na Aruba y a pidi pa haya e oportunidad pa presenta kico Risaralda tin pa ofrece cu ta aporta na e sector di turismo y “Medical Tourism”. Directiva di KvK y representante di ATIA tabata presente y a intercambia ideanan con pa crea enlacenan comercial cu negoshinan di Aruba.
Risaralda, Colombia: un destinacion di wellness & health
E representantenan di Risaralda a elabora riba kico nan ciudad tin di ofrece pa loke ta servicionan pa salud, bienestar y turismo. Un grupo di masomenos 30 persona entre cua tin representante di e sector publico di Risaralda y tambe diferente institucion priva manera e Camara di Comercio di Pereira y e oficina di conferencia y otro negoshinan di Risaralda. Tur e participantenan a bin cu e meta di forma parti di un exposicion di nan producto y servicionan den e sector di Wellness Tourism. Parti di nan mision na Aruba ta pa explora ki sorto di colaboracion por existi y compronde con e producto ‘Aruba’ ta functiona. Nan kier haya conocemento riba e forma con e mercadeo ta hinca den otro y cu ta haci Aruba un destinacion atractivo.
Exposicion na Aruba Renaissance Convention Center
Dia 21 di september e grupo di Risaralda lo ta presente den Renaissance Convention Center pa forma parti di un exposicion caminda nan lo presenta kico tur nan tin di ofrece. For di 9:00 AM te cu 6:00 PM e diferente representantenan di Risaralda lo ta disponibel pa encontra cu e publico y comerciantenan local. KvK kier extende un invitacion na pueblo completo y en particular comerciantenan den e sector di medical tourism, wellness & health pa bishita e exposicion y explora e diferente oportunidadnan cu Risaralda tin di ofrece.
Si bo ta desea mas informacion encuanto e mision comercial, por tuma contacto via [email protected] of yama na 582-1566 ext. 27/42/30.
