KVK: Condicionnan di Hulanda no ta un menasa pero ta fortifica Aruba a lo largo

1312

KVK a participa den e Cumbre via zoom cu Gobierno unda a duna splicacion di e acuerdo financiero cu mester yega na dje cu Hulanda. Madre Patria, despues di un evaluacion extenso, a keda como unico solucion viabel pa Aruba. Pero esaki ta bini cu condicionnan cu pa un parti di e pueblo ta inaceptabel. Camara di Comercio (KvK) sinembargo no ta mira problema y menasa pa Aruba.

Den declaracion cu Satish Daryanani y Martijn Balkestijn a duna na 24ora.com, nan a papia extensamente di e Cumbre y e condicionnan cu Hulanda a pone pa brinda e apoyo financiero na Aruba. Condicionnan manera un entidad cu lo ta envolvi den diferente di e Ministerionan y cu mester duna aprobacion of lo bini cu medidanan cu mester ehecuta.

Na final, Daryani a bisa, nan di KVK a sinti cu di parti di Gobierno tin disponibilidad pa yega na un acuerdo cu Hulanda. Principalmente pasobra a mustra cu no tin otro opcion pa sali di e problema financiero. “Nos ta spera cu Gobierno logra haya aprobacion di Parlamento pa firma e acuerdo cu Hulanda,” e Presidente di KVK Satish Daryanani a comenta.

KVK: Condicionnan di Hulanda no ta un menasa pero ta fortifica Aruba a lo largo

KVK: Condicionnan di Hulanda no ta un menasa pero ta fortifica Aruba a lo largo

Posted by 24ora on Thursday, August 13, 2020

Tambe a sinti cu bou di e otro gremionan, den e buskeda di solucion pa e problema financiero, ta si Aruba no ta mara su mes pa un periodo mucho largo na e regimen cu Hulanda kier bini cu ne. Y cu haciendo esaki, Aruba lo perde tur loke cu el a logra desde su Status Aparte. “Di berdad, ami no ta sinti esaki,” Daryanani a comenta.

Director di Camara di Comercio Martijn Balkestijn ta comparti opinion di Daryanani. Na momento cu lesa e documentonan en cuestion, por sinti un actitud un poco agresivo di Hulanda, cu nan kier tuma Aruba over hustamente den tempo di crisis. “Pero si lesa e documentonan bon, por conclui cu ta fortifica puntonan cardinal cu lo yuda Aruba a lo largo para riba su propio pianan y den un tempo cortico.” Ora di papia di puntonan cardinal, Balkestijn ta referi na streamline di Gobierno di Aruba, haci finanza publico duradero y sostenibel, ahusta economia, mehora finanza y sistema di cuido di salud publico, enseñansa y husticia.

Si mira loke ta para den e documentonan “ta puntonan cu no a cay di shelo, pero cu instancianan internacional a bin ta señala pa hopi tempo caba”, Balkestijn a bisa.

Di otro banda e ta bisa tambe cu tin puntonan cu por cuestiona si ta e miho forma pa atende cu nan, manera Hulanda a pone. Pero en general, no por mira e condicionnan poni door di Hulanda como un menasa pero un forma pa fortifica Aruba.