Kustwacht a rescata seis piscado Venezolano

Dia 20 di september ultimo, Zr.Ms. Groningen a realisa un exitoso operacion di rescate di un boto di pesca flotante 60 miya p’anort di Boneiro. Durante e accion aki seis piscado Venezolano a wordo rescata.

Durante e anochi di 19 pa 20 di september, e avion DASH-8 di Kustwacht a detecta e boto peskero Eudismar, di cual e tripulacion tabata riba dek pidiendo ayudo.

E avion di Kustwacht a yama e tankero Liberty Bay, cu tabata nabegando cerca di e boto di pesca pa yuda. Centro di Rescate y Coordinacion di Kustwacht, a informa Zr.Ms. Groningen, cu tin e patruya costero den e area di Caribe. Despues di esaki Zr.Ms. Groningen inmediatamente a dirigi su mes pa brinda e prome auxilio. A pidi e tankero Liberty Bay pa keda hunto cu e boto te ora cu e stationsschip ta den vecindario pa ofrece asistencia. Na yegada di Zr.Ms. Groningen, a resulta cu e tripulacion ya tabata tin 18 dia cu nan a naufraga, despues cu nan a haya problema di motor durante nan actividadnan di pesca cerca di Trinidad & Tobago. E tripulacion na e momentonan ey tin algun dia caba sin cuminda ni bebida y tabata tin mester di cuido medico urgente.

E hendenan abordo casi a perde nan speransa di sobrevivi na e momentonan ey. Groningen a duna e tripulacio Eudismar prome auxilio den forma di cuido medico, cuminda y bebida. E servici otecnico di Zr.Ms. Groningen siguientemente a monta un di su motornan for di borda riba e boto di pesca, caminda cu e boto, bao di guia di e barco a nabega pa Boneiro. Aki e tripulacion a wordo pasa pa Kustwacht, Koninklijke Marechaussee y hospital na Boneiro haci cargo di e tripulacion.

Zr.Ms. Groningen, desde dia 20 di april 2019, ta activo den Caribe. E bapor, bao di mando di e Kapitein-luitenant ter Zee Nicole Kuipers, ta desplega pa tareanan di kustwacht, operacionnan antidroga y si ta necesario asistencia humanitario. E accion aki tabata e prome accion exitoso despues di e cambio recien di tripulacion dia 6 di september ultimo.