A registra un caso hopi grandi di droga na Aruba. Ta trata di un hayazgo di alrededor di 3 mil kilo di droga, riba lama grandi. Den oranan di dialuna marduga a tuma luga un accion grandi unda cu Kustwacht a gara un boto den awanan internacional cu un cargamento di droga. Parce cu no tin ningun detencion, ni tampoco por a confisca e boto. Autoridad tin henter e caso hermeticamente cera, aunke cu e droga ta warda na Savaneta.
Informacionnan cu nos tin ta cu na momento cu a presenta e caso aki, Ministerio Publico a analisa con e proceso a bay y tin un parti di e procedura no a bay manera debe ser. Parce cu Kustwacht, cu mester cuida awanan teritorial di Aruba, a sali for di nos frontera y a drenta awa internacional ora cu a intercepta e embarcacion cu e droga. Aki ta unda algo a bay robes y p’esey loke cu a keda atras ta e droga so. Mester a laga boto y e tripulacion bay liber riba ordo di Fiscal, debi cu e detencionnan tur tabata ilegal!
E ta un logro hopi grandi pa Kustwacht cu a logra kibra nan record di droga confisca di luna pasa, cual tabata 2.200 kilo di cocaina. E sucedido aki trece un discusion pisa entre e teamnan di husticia manera Kustwacht, Polis, Ministerio Publico y otronan. Segun por a compronde, mirando loke a sosode, Polisnan cu ta atende cu caso di droga a “laba man” y awo e droga ta warda na Savaneta, bou vigilancia di Kustwacht y Marina Real.
Kustwacht a logra dal criminalnan un golpi hopi fuerte cu e confiscacion aki. Unico nota negativo ta cu e proceso no a cana segun ley, den bista di Fiscal. Esaki ta un prueba cu tin masha droga ta circula den awanan rond di Aruba. E droganan aki ta wordo reparti den diferente embarcacion cu ta topa cerca di Aruba y sigui pa nan destinacion.
Por bisa cu no ta prome biaha cu algo asina ta sosode. Mas cu un decada atras tabatin un caso similar, unda cu instancianan di Aruba no tabatin autoridad pa subi y confisca boto y alabes detene personanan den awanan pafo di frontera di Aruba. E tempo ey tambe, despues di detencion, Corte a ordena pa laga e hendenan aki liber.
E droga confisca e biaha’ki tin balor di miyones di florin. Cu e confisacion aki e cantidad di droga confisca den e ultimo cuatro lunanan ta yega rond 5700 kilo.
Ministerio Publico a nenga di suministra informacion riba e caso aki y a referi nos na Kustwacht di Caribe Hulandes. Cerca nan a avisa cu nan lo emiti un comunicado di prensa pronto riba e logro y e eror legal grandi cometi aki! Polis di otro banda a laga nos sa cu nan no tin nada di haber y lo no tuma un caso caminda cu e inicio tabata mal haci y cu na final Hues sin duda lo declara e caso como nulo.
